ТВЕА Бишкек ЖЭБине 5,5 млн. долларга жаңы цех куруп берет

Бишкек Жылуулук электр борборун модернизациялоого (ЖЭБ) катышкан Кытайдын ТВЕА компаниясы ЖЭБде 5,5 млн. долларлык суу даярдап берүүчү жаңы цех куруп берет.

Учурда аны куруу иштери башталганын «Азаттык» радиосуна Улуттук энергохолдингдин башчысы Айбек Калиев кабарлады. Анын иши ушул жылдын июль айларында бүтө турганы 26-февралда борборду жаңылоого кеткен каражаттын чоо-жайын, кырсыктын себептерин иликтеген депутаттык комиссиянын жыйынында да айтылды.

Комиссия мүчөсү, парламент депутаты Сайдулла Нышановдун айтымында, цех куруу алгачкы долбоорго киргизилип, кийин алынып салынган.

— Булар эмне үчүн жаңы ЖЭБди киргизе албай калды? Эмнеге дегенде ошол система жок. Муну кытай тарап 5,5 млн долларга өзүнүн эсебинен, июль айларына бүтүрүп берет экен. Бул эскиден көз карандысыз, жаңы өзүнчө иштей турган цех болот. Баштапкы долбоордо бул цех курулмак, кийин келишим түзүлгөндөн кийинки долбоорго кирбей калган. Бул таң калычтуу.

Депутаттык комиссия мурдагы энергетика министри, азыркы парламент депутаты Осмонбек Артыкбаевден маалымат алышты. Ал ТВЕАнын өкүлдөрү менен келишим түзүлгөнгө чейин тааныштыгы болбогонун белгиледи.

Быйыл 26-январда Бишкек Жылуулук электр борборундагы суу бөлүштүрүүчү жабдык иштен чыгып, катуу суукта абоненттерге беш күн бою жылуулук берилген жок. Бул кырдаал жарым жыл мурда модернизацияланган жылуулук борборуна карата сынды күчөтүп, Кытай берген ири суммадагы каражаттын максаттуу сарпталганы жөнүндө суроо жараткан.

Кырсык боюнча Кылмыш-жаза кодексинин 316-беренеси («Шалаакылык») менен кылмыш иши козголгон. Кырдаалдын чоо-жайын парламентте депутаттык, өкмөттө мекеме аралык комиссия иликтей баштаган.

Жылуулук электр борборун жаңылоодогу жана кытайлык TBEA компаниясы менен келишим түзүүдөгү айрым кемчиликтерди Эсеп палатасы да көрсөткөн.

Булак: Азаттык