Коррупция боюнча маселе талкууланды

Коопсуздук кеңешинин жыйынынан кийин коррупционерлерге карата чечкиндүү чараларды күткөн жарандык коом активдүү болуп жатат. Бул тууралуу Президент Сооронбай Жээнбеков бүгүн, 28-мартта Башкы прокурор Индира Жолдубаеваны кабыл алганда белгиледи.

Президенттик аппараттын басма сөз кызматы билдиргендей, Башкы прокурор Мамлекет башчысына Коопсуздук кеңешинин 8-февралдагы чечимин аткаруу максатында прокуратура органдарынын коррупцияга каршы иш-аракети жөнүндө маалымат берди.

Президент прокуратура органдары тарабынан коррупцияга каршы аракеттенүү боюнча иштер күчөтүлүп, жылыштар бар экенин белгиледи.

Башкы прокурор Индира Жолдубаева Коопсуздук кеңешинин жыйынынан кийин прокуратура органдары өлкөнүн бардык областтарында жергиликтүү бийлик жана укук коргоо органдары менен биргеликте жыйындарды өткөргөнүн айтты. Коррупцияга каршы күрөш боюнча абалды талдоонун негизинде иш-чаралар планы иштелип чыкты. Бул планга ылайык жумуштар күчөтүлүп жатат.

Мындан тышкары Индира Жолдубаева Башкы прокуратура тарабынан кызматтык кылмыш фактылары, анын ичинде мамлекеттик жана муниципалдык менчикти уурдоо фактылары боюнча негизсиз токтотулган же кыскартылган кылмыш иштери кайрадан каралып  жатканын билдирди.