Кыргызстанда 24 миң кул барбы?..

Walk Free Foundation деп аталган эл аралык укук коргоо уюмунун аныктамасына караганда, Кыргызстан кулчулуктун 2018-жылкы глобалдык индексинде 85-орунда турат. Алардын айтымында, Кыргызстан боюнча азыркынын кулчулугунда 24 миң адам жашап жатат. Бул 100 миң калкка 411и эрки чектелген адам туура келет дегенге барабар. Ал эми “азыркынын кулу” катары – коркутуп-үркүтүү, кыйноо, зомбулук, орой мамиле астында жана алданып иштеп жүргөндөр саналат.

Аналитиктер дүйнөнүн 167 өлкөсүн иликтеп, биринчи орунда Түндүк Корея турганын аныкташкан. Бул өлкөдө ар бир онунчу адам кул болуп эсептелет. Ошондой эле ондукка Эритрея, Бурунди, Борбордук Африка Республикасы, Афганистан, Мавритания, Түндүк Судан, Пакистан, Камбоджа жана Иран кирет.

Борбор Азия мамлекеттеринин арасында бул жаатта абал Өзбекстанда оор экени айтылган. Бул өлкөдө 160 миң адам кул деп эсептелип, республика тизмеде 69-орунга чыкты. Анын артында эле 75-позицияда Тажикстан турат.

Мындан тышкары дүйнө жүзү боюнча 40 миллион адам азыркынын кулу болуп жүргөнү айтылат. Алардын 71 пайызы кыз-келиндер.