Эгемендүүлүк күнүнө арналган салтанаттуу иш чарага экс-президенттер Алмазбек Атамбаев жана Роза Отунбаева чакырылат

31-августта Кыргыз Республикасынын Президенти Сооронбай Жээнбеков, борбордук «Ала-Тоо» аянтында өтө турган Кыргыз Республикасынын Эгемендүүлүгүнүн 27 жылдыгына арналган салтанаттуу иш чарага катышат.

Президенттин аппаратынын маалыматтык саясат бөлүмүнүн маалыматына ылайык, Мамлекет башчысы Эгемендүүлүктүн 27 жылдыгына байланыштуу куттуктоо сөз сүйлөйт.

Иш чарага Жогорку Кеңештин төрагасы Дастан Жумабеков, Премьер-министр Мухаммедкалый Абылгазиев, Жогорку соттун төрайымы Айнаш Токбаева, өлкөнүн экс-президенттери Роза Отунбаева, Алмазбек Атамбаев, эл өкүлдөрү, өкмөт мүчөлөрү жана дипломатиялык корпустун өкүлдөрү чакырылат.

Ошондой эле иш чарага Улуу Ата Мекендик согуштун ардагерлери жана тылдын эмгекчилери, эмгек баатырлары, Олимпиада оюндарынын медаль ээлери, парламенттин, өкмөттүн, сот бийлигинин мурдагы жетекчилери, өлкөнүн мамлекеттик жана коомдук белгилүү ишмерлери катышмакчы.