Бажы кызматынын мурдагы төрагасына издөө жарыяланды

Экономикалык кылмыштар менен күрөшүү кызматы Мамлекеттик бажы кызматынын мурдагы төрагасы Адамкул Жунусовго издөө жарыялады.

Кылмыш кодексинин 304-беренеси боюнча (Кызмат абалынан кыянаттык менен пайдалануу) иш козголду.

Тергөөнүн версиясы боюнча Жунусов 2013-2016-жылдар аралыгында «А.» жоопкерчилиги чектелген коомунун өкүлдөрү менен туруктуу коррупциялык байланыштарды уюуштурган. Ал өзүнүн кызмат абалынан пайдаланып, «А.» жоопкерчилиги чектелген коомуна бажы артыкчылыктарын берип турган. Анын натыйжасында 166 миллион сомдон ашуун каражат милдеттүү бажы төлөмдөрү катары бюджетке түшпөй калган.

Экономикалык кылмыштар менен күрөшүү кызматы Адамкул Жунусов тергөө органдарынан качып жатат деп эсептейт.

2018-жылы 18-августта ага сыртынан айып тагылган, 28-августта Бишкек шаарынын Биринчи май райондук соту аны камакка алуу боюнча сыртынан өкүм чыгарган.

2014-жылы Мамлекеттик Бажы кызматын Адамкул Жунусов жетектеген. Ал жетекчилик кызматты 2013-жылдан 2016-жылдын жаз айларына чейин аркалаган. Жунусов кийин Евразия экономикалык комиссиясынын энергетика жана инфраструктура боюнча министри болуп иштеп жүргөн.