Никол Пашинян отставкага кетти

Армения премьер-министри Никол Пашинян отставкага кетти. Өкмөт башчынын кызматтан кетиши өлкөдө мөөнөтсүз парламенттик шайлоо процедурасын баштоого жол ачты.

Пашинян отставкага кетүү ниети тууралуу 2-октябрда Ереванда өткөн митинг учурунда билдирген. Анда өлкөнүн Улуттук жыйыны депутаттарды таркатуу жолдорун катаалдаткан өзгөртүүлөрдү кабыл алган.

Никол Пашинян Армения өкмөтүн быйыл 8-майдан тарта жетектеп келген. Ал бул кызматты апрелдин ортосунан бери өлкөнүн бардык аймактарында өткөн нааразылык акциялардан кийин ээлеген. Акциялардын жыйынтыгында өлкөнү он жылдан ашык башкарган Серж Саргсян бийликтен кеткен.