Тажик бийлиги 29 жылга соттолгон оппозициячы абактан чыгарылбай турганын билдирди

Учурда жаза мөөнөтүн өтөп жаткан белгилүү тажик ишкери жана оппозициячы Зайд Саидов абактан чыгарылбайт. Бул тууралуу Тажикстан Жогорку сотунун төрагасы Шермухаммад Шохиён 4-февралда Душанбедеги маалымат жыйынында билдирди.

Былтыр БУУнун Адам укуктары боюнча комитети тажик бийлигин катаал режимдеги абакта 29 жылдык жаза мөөнөтүн өтөп жаткан ишкерди бошотууга үндөгөн. Анда уюм тажик өкмөтү 180 күндүн ичинде өкүмдү жокко чыгарып, Зайд Саидовго кенемте төлөп берүүгө тийиш экенин белгилеген.

«Биз Зайд Саидовду бошотууга үндөгөн БУУнун Адам укуктары боюнча комитетинин билдирүүсү менен макул боло албайбыз. Соттук жараяндын жүрүшүндө Саидовдун күнөөсү толугу менен далилденген», — деди Шахиён. Ал аталган комитеттин билдирүүсү сунуш гана болгонун айтып, тажик бийлиги аны аткарбай коюуга укуктуу экенин белгиледи.

Былтыр июлда Зайд Саидовдун уулу Хайрулло Саидов комитет атасынын ишин үч жыл иликтеп, ал мыйзамсыз соттолгон деген бүтүмгө келгенин билдирген. Анын айтымында, тажик бийлиги Саясий жана жарандык укуктар жөнүндөгү эл аралык пакттын нормаларын бузган.

Тажикстанда Саидовдун ишинде саясий боёк бар деп эсептелинип келет – белгилүү ишкер камалардын алдында тарапташтары менен бирге «Жаңы Тажикстан» деген партия түзүшкөнүн жарыялышкан.

Белгилүү ишкер жана саясатчы 2013-жылы майда Франциядан кайтып келгенден кийин Душанбе аэропортунда кармалган. Ошол эле жылы декабрда сот аны каржылык «көз боёмочулук кылган, көп аял алган жана бойго жете элек кыздар менен сексуалдык катнашка барган» деген айып менен 29 жылга түрмөгө кескен. Саидов бул айыптоолордун баарын четке кагып келет.