Улукбек Марипов: «ТВЕА тарабынан берилген 20 млн. 300 миӊ өлчөмүндөгү каражат натыйжалуу пайдаланылган эмес»

Бишкек ЖЭБин модернизациялоо алкагында кытайдын ТВЕА компаниясы тарабынан берилген 20 млн. 300 миӊ өлчөмүндөгү гранттык каражат өз багытында жана натыйжалуу пайдаланылган эмес. Бул тууралуу Эсептөө палатасынын төрагасы Улукбек Марипов Жогорку Кеӊеште билдирди.

«Кара-Кече жылуулук-электр станциясынын техникалык-экономикалык негизмемесин иштеп чыгуу үчүн каралган 3 млн доллар иштетилген эмес, мындайча айтканда, аталган документ ушул кезге чейин даярдалган жок. Эки жаӊы мектепти курууга бөлүнгөн 2 млн долларга Бишкек шаарында 1 мектеп курулган. Курулуш баасы өтө жогорулатылганы аныкталды. Трансформаторлорду сатып алууга 9 млн доллар каралса, текшере келгенде, ал 3 млн долларды гана түздү», — деп, ал Бишкек ЖЭБин модернизациялоо алкагында жүргүзүлгөн аудиттин жыйынтыгы боюнча документтер укук коргоо органдарына өткөрүлүп берилгенин кошумчалады.

Андан тышкары, гранттык каражаттын 1 млн долларына кабель, 300 миӊ долларына «Улуттук электр станциялары» жана «Электр станцияларына» эмеректер сатылып алынганы белгилүү болду. Ал эми Бишкек ЖЭБинде иштеген 20 адамды окутуу үчүн 3 млн доллар каражаттын бөлүнүшү да шек жаратпай койбойт.

Эскерте кетсек, Жогорку Кеӊеште Бишкек ЖЭБиндеги авариянын себептерин изилдөө жана Бишкек ЖЭБин калыбына келтирүү үчүн алынган 386 миллион доллар өлчөмүндөгү насыянын пайдаланылышын териштирүү боюнча депутаттык комиссиянын ишинин жыйынтыктары жөнүндө Жогорку токтомунун аткарылышынын жүрүшү тууралуу Өкмөттүн маалыматы угулууда. Жыйынга өкмөт мүчөлөрү, мамлекеттик органдар менен мекемелердин жетекчилери катышып жатат.

Добавить комментарий

Ваш e-mail не будет опубликован. Обязательные поля помечены *