АКШ Түркияга F-35 учактарынын жабдууларын жеткирүүнү токтотот

АКШнын Коргоо министрлиги Вашингтон Түркияга F-35 үлгүсүндөгү учактар үчүн жабдууларды жеткирүүнү токтотконун билдирди. Анкара октябрда орусиялык С-400 зениттик-ракеталык комплекстерди сатып аларын жарыялаган. Пентагон буга каршы чыккан жана дал ушул ыкмада жооп кайтарды.

Түркия С-400 комплекстерин сатып алуу боюнча Орусия менен 2017-жылы эле келишимге кол койгон. Ошол эле учурда былтыр Анкара АКШдан Patriot комплекстерин үч жарым миллиард долларга сатып алган.

Буга чейин АКШ С-400 комплекстери НАТОго мүчө мамлекеттердин системаларына туура келбей турганын, Орусия альянстын биримдигин бузууга аракеттениши мүмкүндүгүн билдирген. Мындан тышкары Вашингтон Түркияга Patriot ракетага каршы комплексин берүү боюнча сунушун артка алышы мүмкүндүгүн маалымдаган.

АКШ менен НАТОнун өкүлдөрү Түркия Орусиянын аскер системаларына ээ болсо, Түндүк Атлантикалык Альянстын жашыруун технологиялары Москванын колуна тийип калышы ыктымал деп чочулашат.

Бирок түрк бийлиги америкалык зениттик-ракеталык комплекстер орусиялык С-400гө альтернатива боло албасын билдирген.

F-35 учактарынын запастык бөлүктөрүн жана эксплуатациялык документтерин жеткирүүнү токтотуу – Түркияга али келе эле учакты сатууну жокко чыгаруунун алгачкы кадамы болуп эсептелет. 28-мартта америкалык төрт сенатор Түркия орусиялык S-400 системасын албайт деген кепилдик болмоюнча ал өлкөгө F-35 үлгүсүндөгү учактарды сатууга тыюу салган жобону Сенаттын кароосуна киргизген.

АКШнын F-35 учактары боюнча чечими Түркия тышкы иштер министри Мевлүт Чавушоглунун ушул аптада Вашингтондо НАТО самитине катышуусун татаалдаштырат. Саммиттин алдында НАТОнун башкы катчысы Йенс Столтенберг Альянс менен Орусиянын мамилеси күн тартибиндеги башкы тема болорун билдирген.