Контрабандалык ундардын 80 пайызы Казакстандан ташылып келип жатканы айтылды

Ушу тапта Кыргызстанга 500 миӊ тоннадан ашууну контрабандалык ун ташылып келүүдө. Бул тууралуу депутат Экмат Байбакпаев Жогорку Кеӊеш жыйынында билдирди.

Жогорку Кеӊештин Басма сөз кызматы билдиргендей, 2014-жылы ундун расмий импорт көлөмү 460 миӊ тонна болсо, 2018-жылы 78 миӊ тонна болгон. Акыркы мезгилде ун өндүрүү 3 эсе азайды, ал эми расмий импорт көлөмү мурдагы бойдон калууда. Азыр ун өндүрүү тармагында иштеген 3 миӊден ашуун жараныбыз жумушсуз калды. Муну токтотпосо болбойт.

«Өкмөт өзүнүн өндүрүшүнө мындай мамиле жасаганы жакшылыкка алып келбейт. Тегирмендерден бюджетке каражат түшпөй калды, салыкчылар акча таппай жүрүшөт. Контрабандалык ундун 80 пайызы Казакстандан ташылып кирүүдө. Демек, биз өзүбүздүн эмес, казак экономикасын колдоп жатабыз. Чек араны тартипке салып, атамекендик ун өндүрүүнү жолго салсак, мамлекеттик бюджетке миллиарддаган каражт түшмөк», — деди ал.