Сооронбай Жээнбеков Россиянын Бажы кызматынын жетекчисин кабыл алды

Өкмөт башчы Сооронбай Жээнбеков бүгүн, 7-июнда Россиянын  Федералдык бажы кызматынын жетекчиси Владимир Булавинди кабыл алды.

Жыйында Евразия экономикалык бирлигине кирген мамлекеттердин кызматташтыгы тууралуу маселелер талкууланды.

Тактап айтканда, кыргыз тараптын ЕврАзЭстен тышкы чек араларындагы өткөрүү пунктарын оңдоо жана өлкөдөгү ветеринардык  жана фитосанитардык лабораторияларды модернизациялоо тууралуу сөз болду.

Сооронбай Жээнбеков бул жумушчу сапары Кыргызстан менен Россиянын стратегиялык мамилесин мүнөздөй турганын  баса белгилеп, орусия тарапка улуттук экономиканын ЕврАзЭс шартына көнүп кетишине көрсөткөн колдоосу үчүн ыраазычылык билдирди.

Ал эми, Владимир Булавин эки өлкө ортосундагы мурда сүйлөшүлгөн макулдашууларды ишке ашыруу динамикасы позитивдүү экенин билдирди. Болгону анын аткарылышына тийиштүү көзөмөл керектигин кошумчалады.