“Милициянын көчмө кабылдамасын колдоо боюнча кичине коомдук кеңештерди түзүү” аталышындагы конференция өттү

Бүгүн, 2019-жылдын 4-июль күнү «Хаят Ридженси Бишкек» отелинде “Милициянын көчмө кабылдамасын колдоо боюнча кичине коомдук кеңештерди түзүү ” аталышындагы конференция өттү. Бул тууралуу ИИМдин басма сөз кызматы билдирди.

Аталган конференцияга Кыргыз Республикасынын ички иштер министринин орун басары Алмаз Орозалиев, Кыргыз Республикасынын Жогорку Кеңешинин депутаты Айнуру Алтыбаева, Кыргыз Бишкектеги Программалык кеңсесинин башчысы Пьер фон Аркс, ЕККУнун улуттук кеңешчиси, милициянын отставкадагы полковниги Шамшыбек Мамыров, жалпы республика боюнча кичине коомдук кеңештердин өкүлдөрү, КРнын Өкмөтүнүн Баткен облусундагы ыйгарымдуу өкүлү Акрам Мадумаров, андан сырткары ЕККУнун милиция кызматкерлери катышышты.

Конференцияны Кыргыз Республикасынын ички иштер министринин орун басары Алмаз Орозалиев ачты. Ал өз сөзүндө: “Милициянын көчмө жыйыны өзүнө адистештирилген автобусту камтып, ичинде даярдалган милиция кызматкерлери кызмат өтөп, анын ичине милициянын аймактык ыйгарымдуу өкүлдөрү, жашы жете электер менен иштөө боюнча бөлүмдүн кызматкерлери менен тергөөчүлөр кирет. Милициянын көчмө кабылдамасы калк акысыз чалуусу үчүн телефондор менен жабдылган. Андан сырткары, милициянын көчмө кабылдамасынын ишин колдоо үчүн жер-жерлерде КААБдын өкүлдөрүнөн курамына кирген кичине коомдук кеңештер түзүлгөн. Ошондой эле, жергиликтүү бийлик органдары Милициянын көчмө кабылдамасынын ишине жигердүү көңүл буруп баштады ”,- деп билдирди.

Андан сырткары, ЕККУнун Бишкектеги программалык кеңсесине көрсөткөн колдоолору үчүн ыраазычылыгын билдирип өттү. Анткени ЕККУ буга чейин 24 унаа тапшырган, бүгүн дагы 6 автоунаа тапшырды, алар GPS навигаторлору менен жабдылган, ал эми ИИМдин Коомдук коопсуздук кызматында Милициянын көчмө кабылдамасынын ишин көзөмөлдөгөн маниторинг борбору түзүлгөн.

Андан соң, Шамшыбек Мамыров, “Милициянын калк менен натыйжалуу иштешүүсүн жогорулатууда маанилүү курал катары колдонулган милициянын көчмө кабылдамасын колдоо боюнча кичине коомдук кеңештердин ролу” аталышындагы өз баяндамасы менен чыгып, азыркы учурда ИИМдин тутумунда 24 Милициянын көчмө кабылдамасы иштеп жаткандыгын билдирди. Эгерде облустар боюнча карасак, Чүй облусунда-2, Ысык-Көл облусунда-2, Жалал-Абад облусунда-4, Ош облусунда-4, Ош шаарында-2, Баткен облусунда-3, Талас облусунда-2 жана Нарын облусунда-4 Милициянын көчмө кабылдамасы бар. Ай сайын МККнын ишинин графиги райондук администрациянын башчылары, шаарлардын мэрлери, РИИБдин жетекчилеринин макулдугу менен түзүлүп, жергиликтүү аймактык бийлик органдарына таратылат.

“МККга кайрылуулардын 90 пайызы социалдык маселелерге байланышкан. Ал эми милициянын ишмердүүлүгүнө тиешелүү кайрылуулар кичинекей гана бөлүктү түзөт”,- дейт Ш.Мамыров.

ЕККУнун Бишкектеги Программалык кеңсесинин башчысы Пьер фон Аркс, Милициянын көчмө кабылдамасы катары колдонуу үчүн 6 кичиавтобустарды тапшырып: “ Качан калк менен милиция чогуу сүйлөшүп, бир пикирге келишкенде гана эң мыкты жыйынтыкка жетишсе болот. Ал эми көчмө кабылдама коомчулук үчүн милицияны жеткиликтүү кылат”,- деген пикирин айтып өттү.

Эскерте кетсек, кичине коомдук кеңеш-бул өзүнө коомчулуктан чыккан активисттерди (квартал башчылары, аксакалдар сотторунун мүчөлөрү), мамлекеттик башкаруу органдарынын жана жергиликтүү өз алдынча
башкаруунун, укук коргоо органдарынын өкүлдөрүн жана башка кызыктар катышуучуларды камтыган, негизги ишмердиги белгилүү аймактын калкына комплекстүү социалдык-укуктук жардам көрсөтүү болуп саналган, конкреттүү жамааттын аймагында түзүлгөн түзүм. Кичине коомдук кеңештер ыктыярдуу негизде иштейт жана жергиликтүү жамааттын мүчөлөрүнүн актуалдуу көйгөйлөрүн чечүүгө көмөктөшөт. Кичине коомдук кеңештер республикадагы 21 жергиликтүү милиция бөлүмдөрүндө өзүнүн ишмердүүлүктөрүн жүргүзүшкөн жана 3,5 миллионга жакын жараны бар 1042 айылдык жааматтарды тейлеген 30 Милициянын көчмө кабылдамасынын ишин колдоого алат.