Айдай Самиева: Сериал менин жашоомду өзгөрттү…

Касиет КУБАНЫЧБЕКОВА,


“Саламатсыздарбы!? Түз эфирде жаңылыктар түрмөгү . Сиздер менен мен, Айдай Самиева. Алгач күндүн маанилүү жаңылыктары!”. Айдай күн сайын ар бир үйгө акыркы жаңылыктарды айтып берип, көрүүчүлөрдүн бир тууганындай эле болуп калды. Эфирде олуттуу – себеби кызматы ошондой. Жашоодо шайыр, ачык-айрым, ак көңүл – себеби адамдык сапаты ошондой. Анда эмесе сөздү Айдай кыздын өзүнө берели.

ѳпчүлүк кыздар диктор болууну самашат. Бул кыялга жетүү үчүн эмне кылуу керек жана диктор болом деген адам кандай сапатка ээ болуусу кажет?

-Мен ѳзүм жеке тажрыйбама таянып айтсам, теледе иштеп баштаган күндѳн – жоопкерчилик эмне экенин үйрѳнѳ алдым. Мисалы дикторлор, бир эле журналисттин бир күн кечке жүрүп, 3 мүнѳттүк кылып, даярдаган сюжетин биз эфир аркылуу элге жеткирген кѳпүрѳ сыяктуу кызмат кылабыз. Андыктан, бул өтө жоопкерчиликтүү мамилени талап кылат. Интеллект, дикция, ар бир айтылып жаткан тыбыш так жана даана болуусу зарыл. Чет тилдерин билүү дагы маанилүү. Диктор-бул спортчу катары кабыл алынат. Анткени, спортсмендер бир эле күн машыгып коюп, анан кѳптѳгѳн ийгиликтерге жетише албайт. Теле алып баруучулар дагы күн сайын ар кандай кѳнүгүүлѳрдү жасап, үндү бапестеп карап, кам кѳрүшү керек.

ѳп жылдан бери «5-каналда» иштейсиз. Сизди бул каналдын жүзү деп да айтышат. Иш ордуңузду которуу жагын ойлонуп кѳрдүңүз беле?

-Мен ѳзүм кесибим боюнча экономистмин. Журналистикага кийин эле аралышып калдым. Бул тармакта иштеп баштагандан кийин гана меники экенин сезе алдым. Ага чейин камера алдында сүйлѳѳ деген оюмда да, кыялымда да жок эле. Иш ордумду которуу боюнча айтсам, башка каналдардан, башка тармактан дагы сунуштар түшкѳн. Бирок, мен бул жерден кете албай койдум. Чындыгында, мен кесиптештерим менен абдан сыймыктанам. Биринчиден, биз кандай тема болбосун бири-бирибизге колдоо кѳрсѳтүп, бир туугандай жылуу мамиледебиз.

-Эфирге кийип чыккан кийимдериңиз дагы башкалардыкынан ѳзгѳчѳлѳнүп турат. Муну окурмандар деле четке какпаса керек. Кайдан кийинесиз, сѳзсүз дүкѳндѳрдѳн кийинсеңиз керек?

-Чон рахмат, кубанычтамын. Ар дайым башкаларга окшобогонго аракет кылам. Бирок, бир гана дүкѳндѳрдѳн эмес, базарлардан да сатып алам, тиктирем. Чет мамлекеттерде жүргѳндѳ да кѳбүрѳѳк алып келгем.  Акыркы учурда тикмечиликке кызыгып, бир эки костюмду ѳзүм тигип кѳрдүм, колумдан келди.

-Кайсы түстѳгү кийимдерди кийгенди жактырасыз?

-Менин жүрѳгүмѳ, жан-дүйнѳмѳ жакын болгон- бул ак түс.

-Бирок, эфирге ак түстѳгү кийимди кийип чыгууга болбойт деп айтышат го…

-Ак түс болот. Мен мисалы, ар бир эфирге чыгаар алдында режиссер менен кеңешип турам. Алар карап кѳрѳт. Менин тажрыйбамда ак түс кийип эфирге чыккан күндѳрүм болду. Мен ал костюмумду абдан жакшы кѳрѳм жана чакырылган жерлерге кѳп кие берем. Менде, муну кийдим эле, экинчи жолу кийбейм деген нерсе жок экен (күлүп).

-Теле алып баруучулук- бул сиз үчүн кесиппи же…

-Албетте, кесип. Мен үчүн чоң кесип. Мен 10 жылдан бери ушуну аркалап, нанымды таап келе жатам. Бул кесиптин артынан жакшы тааныш, досторду таптым.

-Теле алып баруучулуктан сырткары кандай ѳнѳрүңүз бар? Маселен, бул жумуштан кетсеңиз кайсы кесипти аркалап кете аласыз?

— Жогоруда айткандай, мен кесибим боюнча экономистмин. 5 жыл бекер окубаган экенмин деп коем. Анткени, жумушта да ар түрдүү иш-чаралар болуп калганда акча чогултуу жагын мен ѳзүмѳ алып алам (күлүп). Үйдѳ да финансистмин. Кудай мага 2-жолу “кайсы жолду тандамаксың?”- деп мүмкүнчүлүк берсе, мен азыркы эле жолумду тандамакмын. Бирок, экономика жагында да иштеп кете алам деп ѳзүмѳ ишенем.

-Телевидениеде сизге жол көрсөткөн устаттарыңыз болсо керек?

-Ооба, телевидениедеги менин биринчи мугалимим -Павел Штельмах. Ошол адам мага камера алдында кантип сүйлөө, кантип боёнуу,  үндү ойготуу, тарбиялоо деген жумушума тийиштүү нерселердин баарын үйрөттүү. Азыркы күнгө чейин анын кеңештерине суусап турам. Ар дайым жардамын аябайт.

-Эфирде көп өзгөчө окуялар, кырдаалдар көп  болот дешет. Сизде да болгон чыгаар…

-Ооба, эфирде ар түрдүү окуялар болот. Биздин канал 15-кабаттан орун алган. Бир күнү түз эфирде жаңылык окуп жатсам, кокустан жер титиреп баштады. Мен отурган орундук, стол, камералар титиреп, ары-бери кыймылдап жатты. Студиянын сыртында ызы-чуу. А мен столго бекем таянып алып, жаңылыктарды акырына чейин окуганым эсимде. Мага эфирдеги эң оор темалардын бири- балдар жөнүндөгү кайгылуу кабарлар. Эне болгондон кийин, ар бир баланын тагдыры жүрөгүңө жакын болот эмеспи. Ошолорду окуп жатканда жашып жибербесем экен деп, араң кармайм өзүмдү. Бирок эмоцияга алдырбаш керек деген эрежени эстен чыгарбайм.

-Бала демекчи, кызыңыз бар экенинен кабарыбыз бар. Ал жөнүндө айтып берсеңиз.

-Кызым менин биринчи күйөрманым, стилистим жана PR менеджерим. Ал фильмдерди которуп жатканымды билчү. Бала бакчага барганда  да элдин баарына жайып, апам тигинин ролун коштоп жатат, көргүлө деп айта берет экен. Үйдө дагы апам иштеп жатат, ал жөн эле кино көрүп отурган жок да, ал  иштеп жатат деп көп колдоо көрсөтүп келет. Кызым, менин жашоомдун мааниси. Жашоодогу эң чоң жетишкендигим- бул кызыма эне болуу.

-Кечиресиз фильм дегениңиз, учурда 5-каналдан жүрүп жаткан “Эр жүрөк жана сулуу” аттуу түрк сериалды сиз которуп жатасызбы?

Ооба. Мен Кыргыз-Түрк Манас университетинин бүтүрүүчүсү болгондуктан, түрк тилин жетиштүү деңгээлде билем десем болот. 

-Бул сериалда башкы каармандын үнүн коштоп жатканыңызды үнүңүздѳн тааныганбыз. Бирок сизди которуп жатканыңызды билбептирбиз. Которуп, үн коштоп, анан негизги ишиңизге кантип жетишип жатасыз?

— Биздин шеф-редактор Дмитрий Ложниковдун бир сѳзү эсимде калыптыр: “ Адамдын мээси ушунчалык кѳп нерсени жасай алат. А биз аны элестете да албайбыз”. Кѳрсѳ, чын эле ошондой экен. Аябай кыйратып бир нерсе жасап салдым дебейм. Бирок, ушул учурга чейин жасап келген жумуштарым менен салыштырып кѳрсѳм, жеке ѳзүмѳ канаатандым.

-Бул сериал эл арасында популярдуу болуп жаткан учуру. Аны которуп, элге тартулоо сиздин демилгеңизби? Деги эле бул долбоордун жаралышы тууралуу учкай кеп кылып берсеңиз.

— Рахмат. Эл арасында популярдуу болуп жатыптыр деген сѳзгѳ абдан сүйүнүп жатам. Анткени, долбоор жаңыдан башталганда “кандай болот, элге жагып кетеби?”деп коркконбуз. Бул демилге биздин редактор Самат Качкыновго таандык. Долбоор жетекчиликке жагып, мен түрк тилин билген үчүн котормо жагын мага тапшырышты. Бул сунушту мен ойлонбой туруп эле, кабыл алдым. Анткени, менин бала кезимдеги асыл кыялым- котормочу болуу эле. Башында түдүү оорчулуктар болуп, эки жумадай бир-эки сааттан гана уктаган учурларыбыз болду. Кызыгы мурда кино, актерлук жактан алыс адамдар ушуну ишке ашырганыбыз. Анткени үн коштоо деле оңой иштерден эмес экен. Саунд актерлор жок, журналисттерди үн коштоого тартууга туура келди. Бул жагын толугу менен кесиптешим, курбум Алмаш Шабданалиева өз колуна алды. Үндөрүн өзгөртүп, актерлорчо ойноп, кабарчы болуп жүргөн кесиптештерим мага ачылыш болду.  Бул үчүн акча берет бекен деп сурагандары да болгон жок. “Кыргыз тилин биз өнүктүрбөсөк ким өнүктүрөт?!”-деген сөздөрүнөн кесиптештеримде патриоттук сезим күчтүү экенине ынандым.  Ошентип азыр 10 жылдан бери чогуу иштеп жүргөн кесиптештерим менен дагы да жакындап, чоң бир үй-бүлөдөйбүз. Айта берсем көп жакшы нерселер бар. Кыскасы сериал которо баштаганыбыздан бери, жашоомдо чоң өзгөрүүлөр болду.

-Мындан ары деле диктор болуп иштей бересизби же башка пландарыңыз барбы?

-Башка жумуштарга сунуштар болгон. Бирок, мен кете алган жокмун. Ушул жерден пенсияга чыксам деле макулмун (күлүп). Керек болсо, бул менин кыялдарымдын бири. Бул жерде  башка деле жумуштар менен алектенсе болот. Кичинекей кезимде кыялданган котормочулукка деле телевидениеден жеттим. Ушул жерден пенсияга узатышса, мен эң бактылуу айымдардын бири болмокмун.

-Убактыңыздын тардыгына карабай бизге маек куруп бергениңизге ырахмат. Ишиңизге ийгиликтерди каалайбыз.

-Рахмат. Сиздерге да ийгилик.

Булак: “5news.kg”