Караколдо грек-рим күрөшү боюнча ачык турнир өтөт

Эртең, 10-июнда Каракол шаарында спорттун грек-рим күрөшү боюнча мектеп окуучулары арасында республикалык ачык турнир өтөт. Бул тууралуу уюштуруучулар билдирди.

Турнир коомдук ишмер Кайыпбек Карагуловдун жаркын элесине арналууда.

Спорттук иш-чара Ысык-Көл облусундагы «Шапак баатыр» коомдук фондусу жана Кайыпбек Карагуловдун үй-бүлөсү тарабынан уюштурулуп, быйылкы «Адеп, ыйман жана маданият жылына» карата өтүп жатат.

Ага Ысык-Көл, Жалал-Абад облустарынан жана Бишкек шаарынын 12 жаштан 17 жашка чейинки 350 мектеп окуучусу катышып, 13 категориялык салмакта күч сынашат.

Мындан сырткары, турнирге Өзбекстандын жана Таджикстандын жаш балбандары дагы катышат.