Июнь окуясына 7 жыл болду

2010-жылы Ош облусунда болгон июнь окуясына быйыл 7 жыл болду. Расмий маалыматтар боюнча, 2010-жылдагы июнь окуясында 442 адам каза болгон. Кээ бир жерде бул 446 деп айтылып жүрөт. Ал эми коогалаңда жараат алгандардын саны эки миңге чукул. Окуя учурунда 57 адам дайынсыз жоголуп, алардын он тогузу дагы деле табыла элек.

Айта кетсек, июнь окуясынан кийин түштүк аймагын калыбына келтирүү үчүн 10 млрд сомдон ашык каражат бөлүнгөн. Анын 4-5 млрд сомго жакыны чет мамлекеттер менен эл аралык уюмдар тарабынан берилгени айтылып келет.

Бул каргашалуу окуянын 7 жылдыгына байланыштуу президент Алмазбек Атамбаев кайрылуу жасап, бүгүн күндө Кыргызстанда улуттар ортосундагы мамиле жакшы жагына өзгөргөнүн, элдин ынтымагы жылдан жылга жакшырып келе жатканын билдирди.