Бишкек шаарына эртеңден баштап жылуулук берилет

Бишкекте 1-ноябрдан тарта жылуулук бериле баштайт, — деп билдирет мэриянын басма сөз кызматы.

Маалыматка ылайык, Бишкек шаарынын мэри Азиз Суракматов бүгүн быйылкы жылытуу сезонун 2019-жылдын 1-ноябрынан тарта баштоо боюнча токтомго кол койгон.

Объектилерге жылуулук берүү бир нече күнгө созулат. Биринчи кезекте мектеп, бала бакча, ооруканаларга, төрөт үйлөрүнө жана социалдык коргоо мекемелерине жылуулук берилет.

Белгилей кетсек абанын температурасы 5 күн катары менен +8 градустан төмөн болгон учурда жылуулук бериле баштайт.

Өткөн жылы үйлөрдү, социалдык объектерди жылытуу сезону 18-октябрдан башталган.