Өкмөт кабыл алган сактык чараларды аткарууга ар бир мекендешибиз милдеттүү

Учурдагы кырдаалга байланыштуу Азирети Муфтий Максатбек ажы Токтомушевдин расмий кайрылуусу

Бисмиллахир рахмаанир рахиим!!

Урматтуу мекендештер! Кадырлуу момун мусулман бир туугандар! Аллах Таала бул дүйнөнү сыноо жайы кылып жараткан. Кээде жакшылык менен, кээде жамандык менен, кээде ден соолук, кээде оору менен сынайт.

Баарыбызга белгилүү болгондой, коронавирус оорусу бүткүл дүйнөгө тарап жатат. Бүгүнкү күндө ушул коронавирустун өлкө аймагында кеңири тарап кетпеши үчүн, Кыргыз Республикасынын Өкмөт башчысы өлкөдө маданий, спорттук жана билим берүү иш-чараларына чектөөлөрдү киргизди. Ошондой эле, диний башкармалыкка өлкөдөгү диний мекемелердеги иш-чараларга чектөө киргизүү боюнча сунуштарын берди.

Урматтуу мекендештер! Адам баласынын жанын, мал-мүлкүн, ишенимин, аброюн, ден соолугун сактоо динибиздин негизги максаты. Ошондуктан, ден соолукка коркунуч жаралган абалда, шариятыбыз  өзүнүн көрсөтмөлөрүндө жеңилдиктерге уруксат берген. Ислам динибиз оордукка эмес, жеңилдикке негизделген. Алла Таала: “Алла силерге жеңилдикти каалайт, кыйынчылыкты каалабайт” (Бакара, 185), ошондой эле башка бир аятта “Өзүңөрдү өз колуңар менен өлүмгө таштабагыла” (Бакара, 195) – деп буйруган. Ал эми Пайгамбарыбыз (САВ) хадисинде “Өзүңө да, өзгөгө дагы зыян бербе” — деп айткан. Демек, адам өзүнө зыян болчу нерселерден жана башкаларга зыян берүүдөн сак болуусу зарыл.

Ушуга байланыштуу, дүйнөдөгү мусулман мамлекеттердин диний фатваларын эске алып, коронавирус оорусу адамдар көп чогулган жерлерде таркалуусу кооптуу болгонуна байланыштуу, Кыргызстан Мусулмандарынын Дин Башкармалыгы тиешелүү чечимдерди кабыл алды:

  1. Кырдаал турукташканга чейин Жума намазы убактылуу токтотулсун. Жума намазынын ордуна бешим намазы үйлөрдө окулсун.
  2. Мечиттер жабылбайт, намаз убактыларын билдирүү үчүн азан айтылып турсун.
  3. Беш убак намаз үйдө окулуусу сунушталат.
  4. Даават иштери боюнча убактылуу чектөөлөр киргизилсин.
  5. Жаназа намаздары маркумдун жакын туугандарынын жана аз кишинин катышуусунда үйлөрдө окулуусу сунушталат.

Урматтуу мекендештер! Кыргызстан Мусулмандарынын Дин Башкармалыгы мындай кыйын учурларда Алла Таалага кайрылып, күнөөлөргө кечирим сурап, тообо кылып, дуба кылууга чакырат.

Ошондой эле, элибиздин коопсуздугун жана ден соолугун сактоо үчүн Кыргыз Республикасынын Өкмөтү тарабынан кабыл алынган сактык чараларды аткаруу ар бир мекендешибизге милдеттүү.

Эл башына кыйын күн келип турганда, учурдан пайдаланып күнүмдүк керектелүүчү азык-түлүк жана башка буюмдарга бааны атайлап көтөрүү, бул чоң күнөө жана арам. Биз буга жол бербешибиз керек. Жараткан Алла Таала элибизди, мамлекетибизди, бүткүл адамзатты ар кандай жамандыктан, апаат-балээден, бардык оорулардан жана өзгөчө коронавирустан сактасын. Аминь

Максатбек ажы ТОКТОМУШЕВ, Кыргызстан мусулмандарынын Азирети Муфтийи

Добавить комментарий

Ваш e-mail не будет опубликован. Обязательные поля помечены *