Казакстандагы шайлоо, Парламент Мажилисине 3 партия өттү

10-январда Казакстанда Парламент Мажилисине жана маслихаттарга (облустук , шаардык жана райондук кеңештерге) шайлоо өттү.

Казакстандын Борбордук шайлоо комиссиясынын алдын ала жарыя­лаган маалыматы боюнча, шайлоочулардын тизмесине киргизилген 11 миллион 919 миң 241 жарандын 7 миллион 539 миң 280и шайлоого катышып (63,3%), добуштарын берген.

Партиялык тизме боюнча добуш берүүнүн ыкмасында шайланууга катышкан беш партия төмөнкүдөй добуш
алган:

– Казакстандын Калк партиясы – 659 019 добуш же 9,10 пайыз;

– «Нур-Отан» партиясы – 5 148 074 добуш же 71,09 пайыз;

– «Ауыл» калктык-демократиялык пат­риоттук партиясы – 383 023 добуш же 5,29 пайыз;

– Казакстандын «Ак жол» демократиялык партиясы – 792 828 добуш же 10,95 пайыз;

– «Адал» саясий партиясы – 258 618 добуш же 3,57 пайыз. Ошентип, 7 пайыздык босогодон жогору пайызга ээ болгон 3 саясий партия Парламент Мажилисине өттү, алар:

– Казакстандын Калк партиясы;

– «Нур-Отан» партиясы;

– Казакстандын «Ак жол» демократия­лык партиясы.

Булардын ичинен Казакстандын «Ак жол» демократиялык партиясы оппозициялык болуп эсептелет.

Казакстандын Борбордук шайлоо комиссиясынын 12-январда өткөрүлгөн отурумунда Парламентке өткөн партиялардын мандаттары жыйнаган добуштарына ылайык, төмөнкүдөй  бөлүштүрүлдү.

– Казакстандын Калк партиясы – 10 мандат;

– «Нур-Отан» партиясы – 76 мандат;

– Казакстандын «Ак жол» демократия­лык партиясы – 12 мандат.

Ошондой эле, Казакстан калк Ассамблеясы тарабынан квота боюнча 9 депутат Мажилиске шайланган.

Эске салсак, Казакстан Парламентинин Мажилисинде 107 депутаттык орун бар.

Назарбек БАЙЖИГИТОВ,
«Кыргыз Туусу»