«Эң башкысы адам бири-бирин угуп жана ишенүү керек»

Кыргызда «алысты жакын кылган кыз» деп эзелтен айтып келишет. Анын сыңарындай япон кызы кыргыздарга келин болуп турган чагы. Алардын бирге түтүн булатышына балет чоң ролду ойногон. Абдылас Малдыбаев атындагы Кыргыз Улуттук опера жана балет театрынын сахнасынын таланттуу жуптары учурда орус көрүүчүлөрүн багындырууда. Интернационалдуу жубайлар Атабек САДЫРКУЛОВ жана Мегуми МАЦУМОТО менен болгон маек

 “Мен балетти эмес, балет мени тандаган”

– Атабек мырза, балетти тандаганыңызга эмне түрткү болду?

– Атабек Садыркулов: – Балетти мен тандабай эле балетмени тандады десем болот. Атам Ленинграддагы хореографиялык окуу жайды бүткөн, эмгек сиңирген артист. Атамдын арты менен театрда чоңойдум. Ал катышкан бардык спектаклдерди көргөм. Ошентип балет окуу жайына тапшырып калгам.

– Кыргыздарда балдардын балет бийчиси болушун көп жактыра беришпейт, сиздин ата-энеңиз кандай көз карашта болду?

А.С: – «Балет эркектер үчүн эмес» деген ойду искусствону түшүнбөгөн адамдар айтышат. Балет – спорт сыяктуу эле оор, көп эмгекти талап кылат. Биз ар дайым уйкубузду жана тамактануубузду көзөмөлдөп турушубуз керек.

– Азыркы учурда Россияда иштеп жатыпсыздар, ал жакка кандайча барып калдыңыздар?

А.С: – Ооба азыркы учурда Ростов мамлекеттик музыкалык театрында иштеп жатабыз. Бул жакка тоюбузга акча топтоо үчүн келгенбиз. Кыргызстанда билгениңиздей эле айлык аз. А бул жактан жакшы айлык сунушташты, ошондой эле үй да беришти. Бишкекте өзүбүз батирди ижарага алчубуз.

– Кыргызсандагы балет менен чет мамлекеттеги балеттерди салыштыра кетсеңиз?

А.С: – Чет элдик балет менен биздин балетти салыштырсак, айырмасы абдан көп. Аларда балет заманбап стилде. Жаңы классикалык бийлерди бийлешет. Ошондой эле каражат жагы да абдан жакшы, мамлекет жаңы костюмдарга, спектаклдер үчүн декорацияларга акча бөлүп берет.

– Жубайыңыз менен алгач таанышкан күнүңүз…

А.С: – 6 жыл мурун Мексикада гастролдоп жүргөндө таанышкам. Биз бардык нерсени чогуу кылаар элек. Бирге бийлечүбүз, тамактанчубуз, бара-бара сезимдерибиз сүйүүгө айланды. Гастроль бүткөндө Кыргызстанга үйүмө чакыргам.

«Кыргызстанда өз үйүмдө жүргөндөй болом»

– Мегуми айым, кыргыздын келини болуу кандай экен, кайсы салт-санаасы жакты жана кайсынысы жакпады?

М.М: – Мага кыргыздардын кыз ала качуу жана мал союу салтынан башкасынын бары жагат.

Чет жакта жашап калам деп ойлодуңуз беле?

М.М: – Башка мамлекетте жашайм деп эч качан ойлогон эмесмин, бирок турмуш ушундай экен да. Россияда окуп, Кыргызстанда иштедим.

Кыргыз жергесине алгач келгендеги сезимдериңиз кандай болгон?

М.М: – Алгач келгенде эле тоолор көзгө урунган. Кыргызстандын тоолору абдан кооз. Эли да абдан боорукер. Мен бул жерде өзүмдү үйдө жүргөндөй сезем.

– Атабек мырза кайсыл сапаты менен сизди арбап алды?

М.М: – Атабек мен үчүн идеалдуу адам. Бардык сапаттары жагат. Ал боорукер, адептүү, сылык, кең пейил жана бою узун.

– Туугандарыңыз, ата-энеңиз кыргыз балага турмушка чыгууңузга каршы

болгон жокпу?

М.М: – Ата-энем каршы болгон жок. Атабек Японияда 2 жолу болгон. Туугандарым анны көргөндө эле жактырышкан. Ар дайым аны конокко чакырып турушат.

– Сиздерге эки элдин салтын алып жүрүү оорчулук жаратпайбы?

М.М: – Бул таптакыр кыйын эмес, кээ бир каада-салттар окшош, ошондуктан бардыгы жакшы. Эң негизгиси бири-бирибизди угуп, ишенип, ынтымакта жашайбыз.