Ысык-Көлдө КМШ Жаштар парламенттер аралык ассамблеясынын көчмө жыйыны өтүүдө

Чолпон-Ата шаарында Жогорку Кеӊештин депутаты Акылбек Жамангуловдун төрагалыгы менен КМШга мүчө-мамлекеттердин Жаштар парламенттер аралык ассамблеясынын көчмө жыйыны өтүүдө. Иш-чарага алты КМШ өлкөлөрүнөн келген жаш парламентчилер катышып жатат.

Жыйында терроризм жана экстремизм көйгөйлөрү талкууланып, ал коркунучтарга каршы биргелешип күрөшүү маселелери көтөрүлдү. Андан тышкары, террордук жана экстремисттик уюмдарга жаштардын тартылуусун токтотуу жагдайлары тууралуу пикир алмашуу болду.

Ошондой эле, Жаштар парламенттер аралык ассамблеясынын 2016-жылы аткарган иштери тууралуу баяндама жасалып, саясий-экономикалык, маданий-гуманитардык жана коопсуздукту коргоо жаатында бир катар иштер аткарылганы айтылды. Жыйында Жаштар менен студенттердин Бүткүл дүйнөлүк XIX фестивалын өткөрүүгө даярдык маселеси да талкууланды.

Белгилей кетсек, буга чейин КМШга мүчө-мамлекеттердин Жаштар парламенттер аралык ассамблеясы Санкт-Петербург шаарында өткөрүлүп келген.