Сот Аида Салянованы эркинен ажыраткан өкүм чыгарды

Жогорку Кеңештин «Ата Мекен» фракциясынан депутаты Аида Салянованы Ленин райондук соту мүлкүн конфискациялоо менен беш жылга эркинен ажыратты.

Эскерте кетсек, жараянга Кубанычбек Касымбеков судьялык кылды.

Чечимге ылайык, өкүм Салянованын эң кичүү баласы 14 жашка чыккандан кийин ишке ашат. Сот ошону менен катар анын өлкөдөн сыртка чыгуусуна тыюу салды. Учурда Салянованын кичүү кызы эки жашта.

Өкүм окулгандан кийин залдан нааразы болгондор «Наалат» деп кыйкырышты.

Салянованын жактоочусу Чынара Жакупбекова чечим боюнча кийинки инстанция — шаардык сотко кайрыла тургандыгын айтты.

Эске сала кетсек, 2016-жылы декабрь айында Башкы прокуратура депутат Аида Саляновага карата юстиция министри болуп турган кезде Алексей Елисеевдин адвокаттык лицензиясын кызмат абалынан кыянаттык менен пайдаланып калыбына келтирип берген деп кылмыш ишин козгогон.

29-майда Биринчи Май райондук сотунда Саляновага карата козголгон кылмыш иш боюнча сот отуруму болгон+. Анда депутаттын жактоочулары ишти Биринчи Май райондук соту эмес, Ленин райондук соту карашы керектигин айтып, өтүнүч келтирип, сот аны канааттандырган.

Булак: «Спутник»