Жээнбеков менен Назарбаев чек араны талкуулашты

Кыргыз жана казак президенттери чек арадагы абалды талкуулашты. Бүгүн Минскте Жамааттык коопсуздук келишим уюмунун (ЖККУ) саммитинин алкагында Сооронбай Жээнбеков менен Нурсултан Назарбаев өзүнчө жолугушуу өткөрүштү.

Назарбаев Жээнбековду президенттик кызматка шайланышы менен куттуктады. Эки эл ортосундагы жакшы кошуналык мамилелерди кайра калыбына келтирүү керектигин белгиледи.

«Чек арадагы абалдын себептерин биз баарыбыз билебиз. Ошондуктан биз төмөнкүдөй чечимге келдик: өкмөттөр иштеп чыккан «жол картасы» бар, биз аны карап чыктык. Эки өлкөнүн жумуш топтору бул картаны талкуулап кабыл алышат», — деди Нурсултан Назарбаев.

Анын айтымында, эки тараптан тең чек арадагы көзөмөлдү орнотуу чечими кабыл алынды. Ошондой эле ЕАЭБден үчтөн адам жүктөрдү карап, өткөрүп турушат. Ушундай эле ыкма боюнча Кытай менен чек арада текшерүү жүргүзүлөт.

Нурсултан Назарбаев Сооронбай Жээнбековду Казакстанга расмий сапарга чакырганын билдирди.

Кыргызстан президентинин айтымында, жолугушууда ортодогу бардык маселелер талкууланып, бир чечим кабыл алынды.

“Өкмөттөр “жол картасын” декабрь айынын ичинде иштеп чыгышы керек. Ошондо көп маселелер чечилет. Чек ара “жол картасына” кол коюлганча ачылат» — деп билдирди Сооронбай Жээнбеков.

Кыргызстандын мурдагы президенти Алмазбек Атамбаев быйыл 8-октябрда казак жетекчилигин сындаган. 10-октябрдан бери чек арадан Казакстан тарапка өтүү кыйын болуп жатат.

Булак: Азаттык