Таластын Покровка айылында 15 өспүрүм түндө мушташып бир бала каза болду

Таластын Манас районуна караштуу Покровка айылында окуучулардын массалык мушташуусунан бир өспүрүм каза болду. Бул туурасында Талас облустук ИИБдин маалымат кызматы кабарлады.

Билдирүүгө ылайык, окуя 12-декабрдан 13үнө караган түнү саат 2.30дар чамасында болгон. Жаңжал 15 жана 16 жаштагы балдардын ортосунда чыккан.

«Жергиликтүү 15 өспүрүм түндө айыл четиндеги талаага чыгып мушташкан. Анын кесепетинен 16 жаштагы бала башынан жаракат алган. Ал ошол күнү ооруканага жеткирилип реанимацияга жаткырылган. Бирок эртеси каза болуп калды», — деп айтылат маалыматта.

Азырынча жаңжал эмнеден чыкканын тактаган тергөөнүн жыйынтыгы чыга элек. Алгач окуяны териштирип берүү үчүн жаракат алган баланын ата-энеси милицияга кайрылган.

«Каза болгон бала башында ата-энесине окуя тууралуу айтпай жыгылып түштүм деп койгон. Бирок алар шек санап милицияга кайрылышкан. Андан соң окуяга катыштыгы бар балдар суракка алынды. Анын натыйжасында баланын өлүмүнө шектүү катары 16 жаштагы бала убактылуу кармоочу жайына киргизилген. Кийинчерээк Манас райондук сотунун чечими менен ал үй камагына чыгарылды», — деп билдирди маалымат кызмат.

Ошондой эле каза болгон бала техникумда 1-курста окуп жаткан. Окуя болгон күнү ал чоң атасынын үйүнө конокко келгени айтылат.

Аталган факты боюнча кылмыш жаза кодексинин 104-беренеси (ден соолукка атайлап оор залал келтирүү) боюнча кылмыш иши козголуп тергөө иштери жүрүп жатат.

Булак: Спутник