Сооронбай Жээнбеков иш сапар менен Нарын облусуна барат

Бүгүн, 18-майда премьер-министр Сооронбай Жээнбеков аймактарды кыдыруусун улантып, Нарын облусуна бир күндүк иш сапарына барат. Бул тууралуу Өкмөттүн маалыматтык саясат бөлүмү билдирди.

Өкмөт башчы сапар алкагында «Түндүк-Түштүк» альтернативдүү автоунаа жолунун курулушун көрөт, аны менен катар бир катар инфратүзүмдүк, социалдык жана айыл чарба объектилеринин курулушун жүрүшүн текшерет. Премьер-министр Кочкор айылындагы мал соючу цехтин курулушу жана Жумгал районунун Табылгыты айылындагы ветеринардык клиниканын ишмердүүлүгү менен таанышат.

Мындан сырткары Сооронбай Жээнбеков Кочкор районундагы жазгы талаа иштеринин жүрүшү жана Баш-Кууганды айыл аймагындагы суткалык жөнгө салуу бассейнинин мүмкүнчүлүгү, Кызыл-Жылдыз айыл аймагындагы бассейндин курулуш долбоору менен таанышат.

Ошондой эле Премьер-министр Кочкор районунун Чекилдек айылындагы жана Жумгал районунун Чаек айылындагы орто мектептин курулушу менен таанышат.