Чүйдө Wildberries платформасынын логистикалык борбору салынмакчы. Бул тууралуу Экономика министрлигинен билдиришти.
Казанда «Россия — Ислам дүйнөсү: Kazan Forum» иш-чарасында маркетплейстин башчысы Татьяна Бакальчук, экономика министринин орун басары Назарбек Малаев, президенттин Чүй облусундагы өкүлү Канат Жумагазиев жолугуп, инвестициялык долбоорду ишке ашыруу боюнча кызматташуу меморандумуна кол коюшкан.
«Ири долбоор ишке ашса, жаңы чакан жана орто ишканалар өнүгүп, эл иш менен камсыз болот. Ошондой эле Россия менен Кыргызстандын ортосундагы соода-экономикалык кызматташтыкты кеңейтет», — деп айтылат маалыматта.
Ведомство азыр маркетплейсте 17 миңден ашык кыргызстандык сатуучу катталганын, Бишкек менен Ошто анын эки сорттоочу борбору, 130дан ашык буйрутма жеткирүү пунктулары бар экенин белгиледи.