Бүгүн Жогорку Кеңештин төрагасы Нурланбек Шакиев Азербайжандын президенти Ильхам Алиев менен жолугушту. Бул тууралуу парламенттин басма сөз кызматынан билдиришти.
Жолугушууда эки өлкө ортосундагы саясий-экономикалык, маданий-гуманитардык алакаларды арттыруу маселелери талкууланып, парламенттер аралык кызматташтыкты кеңейтүү тууралуу да сөз болду. Соода-экономикалык жана инвестициялык кызматташтык тууралуу да сөз кылган Нурланбек Шакиев Кыргыз-Азербайжан өнүктүрүү фондунун ишмердүүлүгүнө токтолду.
“Бизде мүмкүнчүлүктөр өтө көп. Айрыкча, эки өлкө ортосундагы соода жүгүртүүнүн көлөмүн көбөйтүп, биргелешкен инвестициялык долбоорлорду ишке ашыруубуз кажет”, – деди төрага.
Өз кезегинде президент Ильхам Алиев Жогорку Кеңештин төрагасы Нурланбек Шакиевди жылуу кабыл алып, бул расмий сапар байланыштарды кеңейтүүгө өбөлгө түзөрүн белгиледи. Муну менен катар Ильхам Алиев Кыргыз-Азербайжан өнүктүрүү фондунун уставдык капиталын 25 млн. АКШ долларынан 100 млн. АКШ долларына чейин көбөйтүү жөнүндөгү макулдашууга кол коюлганын белгилеп, биргелешип ишке ашырыла турган долбоорлор тууралуу да сөз кылды.