Садыр Жапаров мамлекеттик институттар алсырап, демократия
охлократияга, парламентаризм анархияга, көп партиялык система саясий коррупцияга
айланган кезде бийликке келди. Саясий коррупция апогейине жетип турганда Садыр Жапаров жана анын үзөңгүлөштөрү башкара баштады.
Эң биринчиден, саясий система реструкцияланды, өлкөнүн экономикалык базасы форматы жаңырды, бекемделди. 2021-жылы конституциялык реформа ишке ашты. Мамлекеттик бийликти бекемдөө, анын институттарын чыңдоо, ар кандай анархияга жана бейбаштыктарга жол ачкан жоболордон кутулуу абзел эле. Конституциялык реформанын натыйжасында институционалдык хаоско чекит коюлуп, саясий фрагментациядан жана бийликти децентралдаштырган элитанын таасиринен арылдык. Мамлекеттик ашыкча түзүмдөр кыскарды, мамлекеттик органдардын фунциялары так аныкталды, 30 жылдан бери кеп болуп, бирок карааны көрүнбөгөн аймактык-административдик реформа акыры жүргүзүлдү.
Биринчиден элиталардын таасири, экинчиден, президент эч нерсеге жооп бербеген, жакшы бир нерсе жасалса ага автор болгон, ишке ашпай калса өкмөттү садага чапкан фигурага айланган. Ошентип бийликтин вертикалы жана башкаруунун жаңы системасы түзүлдү. Мамлекеттик башкаруу системасында псевдодемократиялык, аныгында анархиялык жана бейжоопкерликтен арылып, бийлик институттарынын орду так аныкталды, эң башкысы – президент мамлекеттик башкарууга жөндөмдүү, чыныгы бийликке ээ, ошол эле учурда өлкө тагдыры үчүн жооптуу институтка айланды. Ошентип мамлекеттин пайдубалы бекемделди. Бул тарыхый миссия. Анткени жаңы доордо, XX кылымдын башында жаңы кыргыз мамлекетин калыбына келтирген кайран муун да өз миссиясын аткарган.
Эми XXI кылымдын башында, Садыр Жапаровго жана анын үзөңгүлөштөрүнө мамлекетти бекемдөө миссиясын аткаруу бактысы туш келип отурат. Үзөңгүлөш демекчи, президент Садыр Жапаров саясий стабилдүүлүктү камсыздай алды. Булардын баары мамлекетти бекемдөөгө багытталган стратегиялык чечимдер жана прагматикалык кадамдар.
Экинчиден анын эң жакын үзөңгүлөшү Камчыбек Ташиев менен мамилеси ар кандай аракеттерге жана сыноолорго карабастан, бузулганы жок. Тандем эл аралык тажрыйба, көп учурда шайлоо учурунда гана колдонулчу утурумдук союз. Бизде да бир жылга жетип-жетпей ыдыраган утурумдук тандемдер болгон. Бирок, Садыр Жапаров менен Камчыбек Ташиев экөө тең мамлекеттин кызыкчылыгы үчүн, өлкөнүн биримдигинин урматына ар кандай провокацияларга алдырганы жок, бийик наркын, терең адамгерчилигин көрсөтө алышты.
Мамлекеттин жаңы технологияларга негизделген оптималдуу моделин түзүүгө реалдуу аракеттер көрүлүүдө. Дебюрокатташтыруу жана санариптештирүү коомдук түзүлүштү жана саясий бийликти аныктоочу күчкө ээ. Бул идея гана эмес, зарылдык жана реалдуулук. Кыргызстандын мүмкүнчүлүктөрү кенен жана жетиштүү. Билимдүү, таланттуу жаштары, IТ тармагы боюнча мыкты адистери бар. Авансценага ийкемдүү, мобилдүү, алдыга умтулган, революциялык чакырыктар эмес, жаратман категориялар, модернизациялык долбоорлор менен ойлонгон жаш муун чыга баштады. Ушул муундун энергиясы мамлекетке жумшалып, саясий партиялар аталган уюшмалар, митингдер артта калып, технологиялар жана билим жарандык коомдо чечүүчү роль ойноого тийиш.