Анголанын борбору Луандада Европа Бирлиги (ЕС) менен Африка союзунун жетинчи саммити өз ишин аяктады. Жыйынтык декларацияда тараптар бардык континенттерде тынчтыкка жетүү үчүн көп тараптуу мамилени бекемдөө зарылдыгын белгилешти.
Декларацияда ЕС жана Африка союзу жалпы баалуулуктарга негизделген өнөктөштүктү мындан ары да чыңдай турганы айтылат. Саммиттин катышуучулары дүйнөнүн ар кайсы бурчтарындагы жаңжалдарды чечүүдө эл аралык эрежелерге таянган көп тараптуу системанын маанисин өзгөчө баса белгилешти.
Еврокеңештин башчысы Антониу Кошта мындай деди:«Эрежелерге негизделген көп тараптуу эл аралык тартипке альтернатива жок, анткени альтернатива — бул хаос. Ал эми биз хаостон качышыбыз керек. Украинада, Конго ДРда, Газада, Суданда жана башка аймактарда эл аралык тартипти сактоо өтө маанилүү».
Африка союзунун төрагасы жана Анголанын президенти Жуан Луренсу да эл аралык институттарды “инклюзивдүү жана чыныгы өкүлчүлүккө ээ кылуу” үчүн түзүмдүк реформалар зарыл экенин белгиледи.