Кыргыз Республикасынын Президентинин Администрациясында өткөн аппараттык жыйында эмгек китепчелерди жана аскердик билеттерди санариптештирүү боюнча алгачкы жыйынтыктар угулду.
Министрлер Кабинетинин Төрагасы – Президенттин Администрациясынын Жетекчиси Адылбек Касымалиев билдиргендей, электрондук эмгек китепчеси “Е-Кызмат” системасынын негизинде иштелип чыгып, азыр “Түндүк” мобилдик колдонмосу аркылуу жеткиликтүү болуп калды.
Анын айтымында, эмгек китепчелерин санарип форматка өткөрүү — бул жөн гана ыңгайлуулук эмес, маалыматтын тактыгын, коопсуздугун жана жоголуп кетпей сакталышын камсыздоочу маанилүү реформа.
«Эмгек китепчени санариптештирүү – бул технологиялык жаңылануу гана эмес. Бул жумушчулар үчүн да, жумуш берүүчүлөр үчүн да жогорку деңгээлдеги коопсуздук. Ар бир жарандын эмгек тарыхы так, ишенимдүү жана жеткиликтүү болот», – деди Касымалиев.
Жыйында ошондой эле аскердик билеттерди санариптештирүү боюнча отчет угулуп, бул документти да “Түндүк” мобилдик колдонмосу аркылуу санарип форматта колдонуунун жолдору көрсөтүлдү.