25-апрелде «Туруктуу өнүгүү үчүн Глобалдык тоо диалогунун» алкагында Министрлер Кабинетинин төрагасынын орун басары Эдил Байсалов Лесото Королдугунун Вице-премьер-министри Нтоменг Маджара менен жолугушту.
Маалыматка ылайык, маектин жүрүшүндө Эдил Байсалов Кыргызстан тоолуу өлкө катары туруктуу өнүгүүгө, климаттык өзгөрүүлөргө ыңгайлашууга жана тоолуу аймактардагы базалык кызматтардын жеткиликтүүлүгүн камсыздоого өзгөчө маани берерин белгиледи.
Кыргыз тарап Лесотону «Тоолуу аймактарды өнүктүрүүнүн беш жылдык планын» ишке ашырууга жана 2027-жылы «Бишкек+25» саммитине кошулууга чакырды.
Ошондой эле экономика, айыл чарба, энергетика жана логистика тармактарындагы эки тараптуу кызматташуунун келечеги талкууланганы айтылды.