Жамааттык коопсуздук жөнүндө келишим уюмунун (ЖККУ) Жамааттык коопсуздук кеңешинин 27-ноябрда, бүгүн өтө турган сессиясына катышуу үчүн мүчө өлкөлөрдүн лидерлери Бишкекке келе баштады.
Беларусь президенти Александр Лукашенко, Казакстан президенти Касым-Жомарт Токаев жана Тажикстан президенти Эмомали Рахмон Кыргыз Республикасына келди.
“Манас” эл аралык аэропортунда конокторду Министрлер Кабинетинин төрагасы — Президенттин Администрациясынын жетекчиси Адылбек Касымалиев тосуп алды. Ар бир делегация үчүн кызыл килем төшөлүп, Ардактуу кароол тизилип, кыскача концерттик программа көрсөтүлдү.
ЖККУнун Жамааттык коопсуздук кеңешинин сессиясы 27-ноябрда Бишкекте өтүп, Кыргызстандын төрагалыгынын жыйынтыктоочу иш-чарасы болот.
