Украинанын президенти Владимир Зеленский коопсуздук кепилдиктери берилсе, өлкөнүн НАТОго мүчө болуу аракетинен баш тартууга даяр экенин билдирди. Бул тууралуу ал АКШнын тынчтык планы боюнча жаңы сүйлөшүүлөрдүн алдында айтты.
Жекшемби күнү Зеленский жана АКШ өкүлдөрү Берлинге келип, Украинадагы согушту токтотууга багытталган кезектеги сүйлөшүүлөргө катышты. Түштөн кийин АКШ президентинин атайын өкүлү Стив Уиткофф жана Дональд Трамптын күйөө баласы Жаред Кушнер украин делегациясы менен жолугушуу өткөрдү. Жолугушууга кабыл алуучу тарап да катышкан. Сүйлөшүүлөр дүйшөмбү күнү уланары белгиленди.
Зеленскийдин айтымында, Украинанын НАТОго кирүү аракети бардык союздаш мамлекеттер тарабынан колдоого алынбай келет. Ошондуктан ал альтернатива катары АКШ жана Европа Биримдигинен НАТОнын 5-беренесине окшош коопсуздук кепилдиктерин кароого даяр экенин билдирди.
Украина президенти ар кандай тынчтык планы белгилүү бир компромистерди камтый турганын, бирок өлкө үчүн эң негизгиси АКШ жана Европадан ишенимдүү коопсуздук кепилдиктерин алуу экенин баса белгиледи. Анын айтымында, мындай кепилдиктерге Канада, Япония жана башка өнөктөш мамлекеттер да катышышы мүмкүн.
