АКШ президенти Дональд Трамптын Дүйнөлүк экономикалык форумга (Давос) жасаган сапарынын негизги максаттарынын бири — өзү демилгелеген “Тынчтык кеңеши” долбоорун эл аралык деңгээлде илгерилетүү болду. Америкалык ЖМКлардын маалыматына караганда, кеңешти түзүү боюнча макулдашууга кол коюу аземи бейшемби күнү өтүшү мүмкүн.
Алгач бул кеңеш Газада ок атышууну көзөмөлдөөгө багытталган чакан лидерлер тобу катары пландалган. Бирок кийинчерээк долбоор кыйла кеңири жана амбициялуу форматка айланды. Ошол эле учурда кеңештин курамы жана ыйгарым укуктары боюнча суроолор айрым салттуу союздаш мамлекеттерди бул демилгеге катышуудан убактылуу баш тартууга түрткү болду.
Дональд Трамп шаршемби күнү Египеттин президенти Абдель-Фаттах ас-Сиси менен жолугушууда долбоорго кызыккан өлкөлөр көп экенин белгиледи. Ас-Сиси да кеңешке кошулуу ниетин билдирген.
«Бизге кошулууну каалаган көптөгөн мыкты лидерлер бар. Бул тарыхтагы эң кадыр-барктуу кеңеш болот», — деди Трамп.
АКШ администрациясынын маалыматына ылайык, чакыруу алган 60 өлкөнүн ичинен 35ке жакыны долбоорго катышууга макулдук берген. Трамптын айтымында, айрым мамлекеттер кеңешке кошулуу ниетин билдиришкени менен, бул үчүн өз парламенттеринин макулдугун алышы керек.
Орусия президенти Владимир Путин бул демилгени колдоп, “Тынчтык кеңешине” 1 миллиард доллар бөлүүгө даяр экенин билдирген. Ал эми Беларус президенти Александр Лукашенко — Трамптын чакыруусун алгачкылардан болуп кабыл алганына карабастан, каржылык салым кошпой турганын ачык айткан.
Маалыматка караганда, Трамп бул кеңеш аркылуу Бириккен Улуттар Уюмунун айрым функцияларын алмаштырууну көздөп жатат. Бул демилге эл аралык коомчулукта ар кандай пикирлерди жаратууда.
