Ирандын Ислам революциясын коргоо корпусу (КСИР) АКШ менен мамилелер курчуп турган шартта жаңы жер алдындагы ракеталык базасын тааныштырды. Бул тууралуу Fars маалымат агенттиги кабарлады.
Маалыматка ылайык, объект Иран Куралдуу күчтөрүнүн Башкы штабынын башчысы Абдольрахим Мусави жана КСИРдин Аба-космостук күчтөрүнүн колбашчысы Мажид Мусавинин катышуусунда көрсөтүлдү.
Сапардын жүрүшүндө алар КСИРдин ракеталык бөлүктөрүнүн күжүрмөн даярдыгын жана ыкчам аракеттенүү мүмкүнчүлүгүн баалашты. Аскер жетекчилерине стратегиялык бөлүктүн өнүгүү деңгээли жана толук даярдыгы тууралуу маалымат берилгени айтылат.
Абдольрахим Мусави Иран ар кандай коркунучка даяр экенин белгилеп, өлкөнүн аскердик доктринасы өзгөргөнүн билдирди.
«Биз душмандардын ар кандай аракеттерине даярбыз. Былтыр июнь айында Израиль менен болгон 12 күндүк согуштан кийин Иран коргонуу мүнөзүндөгү доктринадан чабуулга негизделген стратегияга өттү. Ал тез, масштабдуу операцияларды жана асимметриялык согуш ыкмаларын камтыйт», — деди ал.
Бул билдирүүлөр АКШнын Иранга жакын аймактарда аскердик катышуусун күчөтүшү менен коштолгон чыңалуунун фонунда жасалды. Вашингтон Тегеранды келишимден баш тартса, аскердик сокку коркунучу бар экенин эскерткен.
Өз убагында Абдольрахим Мусави АКШ тарабынан жасалган ар кандай жаңылыштык регионалдык согушка алып келерин эскерткен
