АКШ президенти Дональд Трамп Ирандын өзөктүк программасы боюнча сүйлөшүүлөр ийгиликсиз аяктаса, Жакынкы Чыгышка согуштук аракеттерге даяр аскердик кемелерди жөнөтүү мүмкүнчүлүгүн жокко чыгарган жок. Бул тууралуу ал 10-февралда жарыяланган Axios басылмасына берген маегинде билдирди.
«Ал жакка армада жөнөп жатат, балким дагы бирөөсү жөнөйт», — деген Трамп. Ал Иран тарапка АКШнын деңиз күчтөрүнүн экинчи авианосецтик сокку тобун жөнөтүү маселесин карап жатканын кошумчалады.
Ак үйдүн башчысы Вашингтон Иран менен жакын арада макулдашууга жетишүүгө кызыкдар экенин белгиледи. Анын айтымында, эгер сүйлөшүүлөр жыйынтык бербесе, АКШ «өтө катаал чараларды» көрүүгө аргасыз болот.
Ошол эле учурда Трамп Тегеран өткөн жайда АКШ, Израиль жана Иран ортосундагы 12 күндүк аскерий чыңалуунун алдындагы мезгилге салыштырмалуу азыр «ийкемдүүрөөк позицияны» карманып жатканын айтты.
6-февралда Оманда АКШ менен Иран ортосунда кыйыр сүйлөшүүлөр башталган. Америкалык делегацияны президенттин атайын өкүлү Стивен Уиткофф жетектеп, Тегерандан өзөктүк программа, ракеталык арсенал жана Жакынкы Чыгыштагы прокси күчтөрдү колдоо маселелери боюнча бир катар жеңилдиктерди талап кылган.
Иран болсо санкциялар алынган шартта өзөктүк келишимди талкуулоону жандандырууга даяр экенин билдирген. Биринчи этаптагы сүйлөшүүлөр оң бааланганы менен, тараптар ортосунда пикир келишпестиктер сакталып жатканын белгилешкен.