Бишкек шаарындагы Улуттук тарых музейи имаратында Кыргыз Республикасынын Маданият, маалымат жана жаштар саясаты министрлигинин 2025-жылдын жыйынтыгы боюнча коллегия жыйыны өттү. Иш-чарага Кыргыз Республикасынын Министрлер Кабинетинин Төрагасынын орун басары Эдил Байсалов, министрликтин коллегия мүчөлөрү, Кыргыз Республикасынын Жогорку Кеңешинин өкүлдөрү, түзүмдүк бөлүмдөрдүн жана аймактык башкармалыктардын жетекчилери катышты.
Жыйында министрликтин өткөн жылдагы ишмердүүлүгү, жетишкен жыйынтыктары жана алдыдагы артыкчылыктуу багыттары талкууланды. Эдил Байсалов маданият тармагы улуттук иденттүүлүктү бекемдөөдө жана коомду бириктирүүдө негизги роль ойной турганын белгилеп, мамлекет чыгармачылык демилгелерди колдоого жана жарандардын маданий баалуулуктарга жеткиликтүүлүгүн камсыз кылууга өзгөчө көңүл бурарын айтты.
Анын айтымында, аймактык маданий программаларды өнүктүрүү, искусствонун заманбап түрлөрүн колдоо жана жаштардын потенциалын ачуу мамлекеттик саясаттын маанилүү багыттарынын бири болуп саналат. Ошондой эле өлкөнүн бардык аймактары үчүн маданий кызмат көрсөтүүлөргө бирдей шарт түзүү жана Кыргызстандын тарыхый-маданий мурастарын эл аралык аренада илгерилетүү зарылдыгы белгиленди.
Жыйындын жыйынтыгында министрликке китеп чыгарууну өнүктүрүү, китепканаларды модернизациялоо, заманбап маданият үйлөрүн куруу жана жаш аткаруучулар үчүн эл аралык стипендиялык программаларды ишке киргизүү боюнча ишти күчөтүү тапшырылды.