АКШ жана Израиль Иран аймагына жасалган аскердик соккуларды күчөттү. Израиль бийлиги Тегерандагы бир катар объектилерге жана режимдин лидерлерине каршы чабуулдар жасалганын билдирди.
Израилдин коргонуу армиясы (ЦАХАЛ) маалымдагандай, соккулар президенттин кеңсесине, Улуттук коопсуздук боюнча жогорку кеңешке жана мамлекеттик медианын имаратына багытталган.
АКШнын Борбордук командачылыгы (CENTCOM) алгачкы 72 саат ичинде 1700дөн ашуун бутага сокку урулганын билдирди.
Ирандын Tasnim маалымат агенттиги өлкөнүн борбордук бөлүгүндөгү Кум шаарындагы объект да жабыркаганын кабарлады. Ирандын Кызыл Жарым Ай коомунун маалыматына ылайык, соккулар башталгандан бери 787 адам каза болгон.
Дональд Трамп Иран жетекчилигинин мураскерлеринин көбү “жок кылынганын” айтып, алардын ордуна “бир кыйла орточо” адамдар бар экенин кошумчалады. Анын айтымында, эң оболу аскердик коркунуч нейтралдаштырылышы керек.
Ирандын ядролук объектилери да соккуга кабылды. Америкалык Vantor компаниясы жарыялаган спутник сүрөттөрүндө Натанз шаарындагы өзөктүк объектилерде кыйроолор бар экени көрүнөт. Атом энергиясы боюнча эл аралык агенттик (МАГАТЭ) Натанздагы уран байытуу заводунун жер алдындагы имараттарынын кире бериштери жабыркаганын тастыктап, радиациялык коркунуч күтүлбөй турганын билдирди.
Ислам революциясынын сакчылар корпусу АКШнын Бахрейндеги авиабазасына “ири масштабдагы” сокку урганын жарыялады.
Ошондой эле АКШнын Сауд Аравиясындагы элчилиги дрон чабуулунан кийин убактылуу жабылды. АКШнын Мамлекеттик департаменти Жакынкы Чыгыштагы алты өлкөдөгү, анын ичинде Катар жана Иорданиядагы кызматкерлерге эвакуациялануу боюнча көрсөтмө берди.