Кытай Иран аймагындагы кырдаалга байланыштуу ок атышууну токтотуу боюнча аракеттерди колдоонун маанилүүлүгүн белгиледи.
Маалыматка ылайык, Кытайдын тышкы иштер министри Ван И Пакистандын тышкы иштер министри Исхак Дар менен телефон аркылуу сүйлөшүү өткөрдү. Анда тараптар Жакынкы Чыгыштагы абалды талкуулашты.
Ван И учурдагы жарашуу келишимин “алсыз” деп баалап, негизги максат жаңы кагылышуунун алдын алуу жана жетишилген тынчтыкты сактоо экенин белгиледи. Ал эл аралык коомчулукту кырдаалды курчутуучу аракеттерден баш тартууга чакырды.
Ошондой эле Кытай Пакистандын АКШ менен Ирандын ортосундагы сүйлөшүүлөрдү уюштуруудагы ролун жогору баалады.
Өз кезегинде Исхак Дар ортомчулук аракеттердин жүрүшү тууралуу маалымат берип, Пакистан Кытай менен биргеликте аймакта тынчтыкты орнотууга салым кошууга даяр экенин билдирди.
Белгилей кетсек, март айынын соңунда Бээжинде өткөн жолугушууда эки өлкөнүн тышкы иштер министрлери аймакта тынчтык жана туруктуулукту калыбына келтирүүгө багытталган беш пункттан турган планды сунушташкан.
