Казакстандын Президенти Касым-Жомарт Токаев Астана шаарында өтүп жаткан экологиялык саммитте сүйлөп жатып, Каспий деңизи аймагында аскердик курал колдонууга толук тыюу салууну сунуштады.
Анын айтымында, Каспий деңизи экологиялык коркунуч алдында турат жана аны сактоо биологиялык ар түрдүүлүктү, ошондой эле аймактык туруктуулукту камсыз кылуу үчүн өтө маанилүү. Президент белгилегендей, Казакстан буга чейин деңиздин мындан аркы деградациясын алдын алуу боюнча мамлекеттер аралык программаны иштеп чыгуу демилгесин көтөргөн. Ошондой эле өлкөдө Каспий деңизин изилдөө боюнча атайын илимий борбор түзүлүп, регионалдык илимий кызматташтык өнүгүүдө.
“Бул уникалдуу жаратылыш байлыгын сактоо боюнча аракеттерди бардык эл аралык өнөктөштөр колдошу керек. Ошондуктан Каспий аймагында аскердик курал колдонуу толугу менен четтетилип, тыюу салынышы зарыл”, — деди Токаев.
Мындан тышкары, ал глобалдык суу ресурстарын башкаруу маселесине да токтолуп, Бириккен Улуттар Уюму алкагында эл аралык суу уюмун түзүү демилгесин эске салды. Бул сунуш 2025-жылдын декабрында Ашхабад шаарында көтөрүлгөн. Президенттин айтымында, учурда БУУ өзүнүн мандаттарын кайра карап жаткан шартта, суу ресурстарын глобалдык деңгээлде башкарууну күчөтүү үчүн жаңы мүмкүнчүлүктөр ачылууда. Бул багыттагы консультациялар Астанада өтүп жаткан саммиттин алкагында башталары күтүлүүдө.
