Ташкент шаарында Өзбекстан президенти Шавкат Мирзиёевдин төрагалыгы менен Борбор Азия мамлекеттеринин башчыларынын 7-консультативдик жолугушуусу өттү.
Жыйынга Азербайжандын президенти Ильхам Алиев, Казакстандын президенти Касым-Жомарт Токаев, Кыргызстандын президенти Садыр Жапаров, Тажикстандын президенти Эмомали Рахмон, Түркмөнстандын президенти Сердар Бердымухамедов жана БУУнун Борбор Азия боюнча превентивдик дипломатия борборунун башчысы Каха Имнадзе катышты.
Саммитте региондук кызматташууну күчөтүү, биргелешкен долбоорлорду ишке ашыруу жана жалпы интеграциялык процесстер талкууланды.
Мирзиёев соңку жылдарда Борбор Азияда интеграциянын динамикасы жогорулап, ачык диалог жана биргелешкен аракеттер ар кандай маселелер боюнча натыйжалуу чечимдерди алып келгенин белгиледи.
Анын айтымында, региондун инвестициялык жагымдуулугу өсүүдө, үчүнчү өлкөлөрдүн базарларына экспорт кеңейүүдө, транзиттик мүмкүнчүлүктөр да жогорулап жатат. Өткөн жылы Борбор Азия өлкөлөрүнүн өз ара соодасы 10,7 млрд долларга жетсе, регионго келген түз инвестициялардын көлөмү 17%га көбөйгөн.
