Иран АКШ менен ядролук программа боюнча сүйлөшүүлөрдү кайра баштоого каршы эмес, бирок диалог «урматтоо жана кадыр-барк негизинде» жүрүүгө тийиш. Бул тууралуу Ирандын тышкы иштер министри Аббас Аракчи The Guardian басылмасына билдирген.
Аракчинин айтымында, дипломатия гана чыңалууну азайтып, маселелерди чечүүгө жардам бере алат. Ал АКШ президенти Дональд Трамптын администрациясы менен сүйлөшүүлөрдү калыбына келтирүү боюнча бир катар ортомчулардан сунуштар келип жатканын белгиледи.
Министр белгилегендей: «Дипломатиядан качкан Иран эмес. Батыш дайым өз эркин таңуулоого аракет кылган. Эгер алар иран эли менен урматтоо тилинде сүйлөшсө, жооп да ошол эле деңгээлде болот», — деди Аракчи.
Буга чейин АКШ менен Иран ортосунда беш раунд сүйлөшүү өткөн, бирок процесс Израилдин АКШнын колдоосу менен ирандык ядролук объектилерге жасаган чабуулдарынан кийин үзгүлтүккө учураган.
Тегерандын позициясы өзгөргөн жок: Иран уранды өз аймагында байытууга «ажырагыс укук» катары карайт жана бул укуктан баш тартпай турганын дагы бир жолу баса белгиледи.