Быйыл, 2025-жылы, жол куруу боюнча өлкөбүз тарыхый көрсөткүчкө жетти. Эгемендик алган жылдан берки бардык жылдар менен салыштырганда, жол куруунун көлөмү боюнча эң жогорку рекорд орун алды. Анын бирден-бир себеби, техникалык базанын жаңыланышы.
Жакшы билесиздер, 2022-жылга чейин колубуздагы техникалардын көбү жарактан чыгып, айрымдары 1975-жылдары чыгарылган, союздан калган техникалар болчу. Ага байланыштуу жол тармагындагы мамлекеттик ишканалар жол кура албайт болчу.
2022–2023-жылдары мамлекет жол тармагын жаңылоого киришип, республикалык бюджеттин эсебинен 297 даана жаңы техника сатып алды.
2024-жылы дагы 453 атайын техника алынып, автогрейдер, самосвал, экскаватор, бульдозер сыяктуу керектүү машиналар министрликтин карамагына берилди.
Алдыдагы 2025–2026-жылдары да ири колдоолор күтүлүүдө:
JICA агенттигинин колдоосу менен 48 даана техника.
Кытай гранты аркылуу 144 даана техника.
Дүйнөлүк банк аркылуу 69 даана техника.
Корея өнүктүрүү фонду аркылуу 223 даана техникаларды алуу күтүлүүдө.
Жыйынтыгында 2023–2026-жылдар аралыгында министрликтин техникалык базасы 1234 даана жаңы техника жана жабдыктар менен толукталат.
Техниканын жаңыртылышы жол куруу темпин да кескин жогорулатты. Быйыл эле Транспорт министрлиги аркылуу 1200 чакырымга жакын жол асфальтталды. Мындан тышкары Бишкек, Ош жана башка ири шаарлардын ички жолдору оңдолуп, эгемендүүлүк алгандан бери жол курууда рекорддук көрсөткүчкө жеттик.
