Акыркы жылдары Кыргызстанда социалдык жана инфраструктуралык объектилердин курулушу мурдагыдан кыйла көбөйдү. Мектептердин, өндүрүштүк ишканалардын, жолдордун жана башка маанилүү объектилердин ачылышы күнүмдүк көрүнүшкө айланып баратканы муну даана тастыктайт.
Расмий маалыматка ылайык, бир жылда 111 мектепке чейин курулган учурлар болгон. Бул көрсөткүчтү эсептегенде, өлкөдө ар үч күн сайын бирден жаңы мектеп пайдаланууга берилген деп айтууга болот. Мындай ири көлөмдөгү иштерди каржылоо өзүнөн-өзү пайда болгон жок — акыркы жылдары жүргүзүлгөн реформалардын жана мамлекеттик кирешелердин өсүшүнүн натыйжасы.
Мамлекеттик бюджеттин кирешесин көбөйткөн негизги факторлордун бири — бажы жана салык тармактарындагы реформалар. Ошондой эле Кумтөрдүн ишмердүүлүгүнүн мамлекеттин толук контролуна өтүшү экономикага зор салым кошуп жатат.
2025-жылдын 10 айынын жыйынтыгы боюнча:
Кумтөрдүн жалпы кирешеси пландалган 55 млрд 127 млн сомдун ордуна 80 млрд сомго жетти.
Ишкананын таза кирешеси пландагы 13 млрд 373 млн сомдун ордуна 36 млрд 900 млн сомду түздү.
Бюджетке түшкөн салыктар жана төлөмдөр план боюнча 14 млрд 43 млн сом болушу керек эле, бирок 16 млрд 272 млн сом түшкөн.
2024-жыл үчүн 2025-жылы төлөнө турган дивиденддер 12 млрд 900 млн сом деп пландаштырылса, иш жүзүндө 13 млрд 49 млн сом өлкө казынасына которулган.
Өсүп жаткан кирешелер төмөнкү багыттарга багытталууда:
жолдорду оңдоого,
социалдык объектилерди курууга,
30 жылдан бери топтолуп келген көйгөйлөрдү чечүүгө.
Мамлекеттин айтымында, эң ириде социалдык маселелер толук чечилгенден кийин бюджеттин эбегейсиз бөлүгү түздөн-түз өнүгүү долбоорлоруна, жаңы технологияларга, региондорду бекемдөөгө жана бирдиктүү экономикалык өсүштү камсыздоого жумшалат.