Америкалык Ford компаниясы электромобилдерге байланыштуу мурдагы амбициялуу пландарын кайра карап чыгып, бензин жана гибрид автоунааларды чыгарууга көбүрөөк көңүл бура баштады. Бул тууралуу компания дүйшөмбү күнү расмий билдирди.
Маалыматка ылайык, Ford акыркы жылдары электромобилдер багытында ири инвестиция салганына карабастан, олуттуу каржылык жоготууларга учураган. 2023-жылдан бери электромобилдерге кеткен чыгым 13 млрд долларды түзсө, компания 2024-жылдын аягында бул багытта дагы 19,5 млрд долларга чейин чыгым тартылышы мүмкүн экенин билдирди.
Ушуга байланыштуу Ford электр менен иштеген F-150 Lightning пикабын чыгарууну токтотуп, анын ордуна бензин кыймылдаткычы бар, жүрүү аралыгы узартылган версиясына басым жасоону чечти.
Ошондой эле өндүрүш тармагында да өзгөрүүлөр болот. Теннесси штатындагы BlueOval City кампусунда жайгашкан электромобилдер борбору эми «Теннесси жүк унаалары заводу» деп аталып, ал жерде жеткиликтүү бензин менен иштеген жүк автоунаалары чыгарылат. Ал эми Огайо штатындагы Ford заводунда бензин жана гибрид кыймылдаткычы бар жаңы фургондор өндүрүлмөкчү.
Компаниянын маалыматына караганда, алдыдагы мезгилде Ford гибриддик технологияларга, салттуу бензин кыймылдаткычтарына жана баасы жеткиликтүү, компакттуу моделдерге артыкчылык берет. Бул кадам базардагы суроо-талапка ылайыкташуу жана чыгымдарды кыскартуу максатын көздөйт.
