Кыргыз Республикасынын Министрлер Кабинетинин Төрагасы — Президенттин Администрациясынын Жетекчиси Адылбек Касымалиев Президенттин Администрациясынын кызматкерлеринин жалпы жыйынында 2025-жылдын жыйынтыгын чыгарды. Жыйында бир катар кызматкерлерге Министрлер Кабинетинин Ардак грамоталары тапшырылып, Төраганын алкышы жарыяланды.
Адылбек Касымалиев жыйынды ачып жатып, жамаатты келе жаткан 2026-жыл менен куттуктап, 2025-жыл Администрация үчүн жөнөкөй эмес, мазмундуу жыл болгонун белгиледи. Ал коюлган бардык милдеттер командалык жана системалдуу иштин аркасында аткарылганын белгиледи.
Жылдын жыйынтыгы боюнча төмөнкү олуттуу натыйжалар белгиленди:
- Кыргызстандын ички дүң продукты (ИДП) 1,8 триллион сомго жетти, өсүү темпи 10%дан ашты;
- Консолидацияланган бюджет биринчи жолу 1 триллион сомдон өттү;
- Республикалык бюджет 34,3 миллиард сом профицит менен аяктады;
- Биринчи жолу өнүктүрүүгө кеткен чыгымдар социалдык чыгымдардан ашты;
- 341 инфраструктуралык объект ишке киргизилди.
Жыйындын жүрүшүндө аймактар менен өз ара аракеттенүү, тармактык жана тышкы саясат, протоколдук камсыздоо, укуктук камсыздоо, маалымат каражаттарында чагылдыруу, контролдоо жана документ жүгүртүү боюнча жооптуу бөлүмдөрдүн ишине жогорку баа берилди.
Адылбек Касымалиев кызматкерлерге берилген эмгеги жана кесипкөйлүгү үчүн ыраазычылык билдирип, 2025-жылдын жыйынтыгы ар бир кызматкердин салымы менен мүмкүн болгонун белгиледи. Ал 2026-жылы да Президенттин Администрациясы бирдиктүү команда болуп натыйжалуу ишин улантарын билдирди.
