Кыргыз Республикасынын Министрлер Кабинетинин Төрагасы Адылбек Касымалиев мамлекеттик органдардын жетекчилери жана Президенттин облустардагы ыйгарым укуктуу өкүлдөрүнүн катышуусунда аппараттык жыйын өткөрүп, өлкөдө 100 күндүк реформалык демилгелерди талкуулады.
Жыйындын жүрүшүндө эки негизги демилге сунушталды:
Бажылык тариздөө процессин жөнөкөйлөтүү:
Тышкы экономикалык ишмердик субъекттери үчүн товарларды идентификациялоо процедурасын жеңилдетүү максатында борборлоштурулган санариптик «бирдиктүү терезе» түзүлөт. Арыздар автоматтык түрдө бөлүштүрүлүп, ведомстволор ортосунда электрондук өз ара аракеттенүү камсыздалат.Товарлар боюнча түшүндүрмө берүү мөөнөтү үч жумушчу күндөн ашпоого милдеттендирилет.
2024-жылы 14 785, 2025-жылы 16 314 уруксат документтери берилген, бул процедуранын узактыгы жана логистикалык чыгымдарга терс таасир берерин көрсөткөн.
Аскерге чакырылууга чейинки жарандарды медициналык кароону жөнөкөйлөтүү:
Учурда текшерүүлөр негизинен аскер комиссариаттарында жүргүзүлүп, саламаттыкты сактоо тармагына жүк жаратат. Жылына болжол менен 180 000 адам, анын ичинде 50 000 аскерге чакырылуучу жаран, медициналык кароодон өтөт.Демилге бирдиктүү электрондук реестрди түзүү, медициналык текшерүүлөрдү баштапкы медициналык-санитардык жардам уюмдарына өткөрүү жана “Түндүк” мобилдик тиркемеси аркылуу маалыматтарды киргизүүнү камтыйт.
Пилоттук долбоор Чүй облусунун Аламүдүн районунда 700гө жакын адамды камтып ишке ашырылууда, андан соң система республика боюнча жайылтылат.
МинКаб Төрагасы реформалардын сапаттуу жана өз убагында ишке ашырылышы үчүн мамлекеттик органдардын жетекчилеринин жеке жоопкерчилигин белгиледи. Ал ошондой эле реформалардын экономикалык өсүштү сактоо, туруктуу өнүгүү жана жарандардын бакубаттуулугун жогорулатуу багытында маанилүү экенин белгиледи.
