Испаниянын түштүгүндөгү Кордова шаарынын жанында эки ылдам жүрүүчү поезд рельстен чыгып, бири-бири менен кагылышып, кеминде 21 адам каза болуп, дагы 25 адам оор жаракат алды. Бул тууралуу өлкөнүн расмий органдары билдиришти.
Маалыматка ылайык, кырсык жекшемби күнү жергиликтүү убакыт боюнча саат 19:45 чамасында Амадус аймагында, Кордова шаарынан болжол менен 20 чакырым алыстыкта катталган. Малага–Мадрид багыты боюнча бара жаткан, ичинде 317 жүргүнчүсү бар поезд белгисиз себептерден улам рельстен чыгып, каршы багытта Мадридден Уэльва шаарына кетип жаткан башка ылдам поезд менен кагылышкан. Натыйжада экинчи поезд да рельстен чыккан.
Испаниянын транспорт министри Оскар Пуэнте окуяны “коркунучтуу” деп атап, Малага–Мадрид поездинин акыркы эки вагону рельстен чыгып, каршы поезддин алдыңкы эки вагону менен кагылышканын билдирди.
Кырсык болгон жерге Андалусия аймагынан шашылыш жардам кызматтары жөнөтүлүп, жергиликтүү тургундар да жардам көрсөтүп, жеңил жаракат алгандарды жакынкы спорт комплексине жеткирүүгө көмөктөшкөн. Өлкөнүн Өзгөчө кырдаалдар боюнча аскердик бөлүгү да тартылды.
Бийликтин маалыматына караганда, жабыркаган темир жол тилкесинде поезд каттамы жок дегенде шейшембиге чейин токтотулат.
Испаниянын премьер-министри Педро Санчес социалдык тармактар аркылуу кырдаалды өкмөт тыкыр көзөмөлдөп жатканын билдирсе, өлкөнүн королдук үй-бүлөсү каза болгондордун жакындарына көңүл айтты.
