Японияда парламенттин төмөнкү палатасына шайлоо өткөрүү боюнча расмий үгүт кампаниясы башталды. Добуш берүү 8-февралда өтөт жана анын жыйынтыгы өлкөнүн кийинки өкмөтүнүн курамын аныктайт.
Маалыматка ылайык, талапкерлерден арыз кабыл алуу шейшемби күнү эртең мененки саат 8:30да башталган. Бул өткөн жылдын октябрында Такаити Санаэ премьер-министр болуп дайындалгандан берки алгачкы жалпы улуттук шайлоо болуп саналат. Ошондой эле бул 2024-жылдын аягынан берки парламенттин төмөнкү палатасына өткөрүлүп жаткан биринчи шайлоо болуп эсептелет.
Шайлоонун жыйынтыгында төмөнкү палатадагы 465 депутаттык мандат толугу менен жаңыланат. Анын ичинен 289 орун бир мандаттуу округдар аркылуу, ал эми 176 мандат пропорционалдык система менен бөлүштүрүлөт. Парламентте көпчүлүк орунга ээ болуу үчүн 233 мандат талап кылынат.
Адистердин баамында, шайлоо өнөктүгүнүн негизги темасы учурдагы мамлекеттик саясат болот. Талапкерлер калктын жашоо-турмушуна түз таасир эткен баалардын өсүшүнө каршы чараларды, анын ичинде керектөө салыгын өзгөртүү мүмкүнчүлүгүн сунушташы күтүлүүдө. Мындан тышкары, тышкы саясат жана улуттук коопсуздук маселелери да кеңири талкууланат.
Расмий үгүт иши 12 күнгө созулат.
