АКШ президенти Дональд Трамп Иран АКШ менен “олуттуу сүйлөшүүлөрдү жүргүзүп жатканын” билдирди. Бул тууралуу ал ишемби күнү журналисттердин суроолоруна жооп берип жатып айтты.
Air Force One учагында Иран боюнча акыркы чечим кабыл алынган-алынбаганы тууралуу суроого Трамп:
— Албетте, мен муну айта албайм. Бирок ал тарапка багыт алган абдан чоң жана кубаттуу кемелерибиз бар, — деди.
Анын айтымында, АКШ Иран менен ядролук куралдан баш тартууну камтыган келишимге жетишүүгө үмүттөнөт. Ошондой эле Дональд Трамп Fox News телеканалына берген маегинде Иран менен жүрүп жаткан сүйлөшүүлөр учурунда АКШ Перс булуңундагы союздаштары менен аскердик пландарын бөлүшө албай турганын айтты.
Өз кезегинде Ирандын президенти Масуд Пезешкиан жума күнү Тегеран талаш-тартыштарды чечүүдө диалогду жана байланыштарды ырааттуу карманып келерин, согушка умтулбасын билдирген.
Анын айтымында, Ирандын позициясы кадыр-баркка негизделген дипломатияга, эл аралык укуктун алкагындагы кызматташтыкка, өз ара урматтоого жана коркутуулардан же басым жасоодон баш тартууга таянат.
АКШ болсо Иран менен түзүлө турган мүмкүн болгон келишимде уран байытууга тыюу салуу, байытылган уранды алып салуу, узак аралыкка учуучу ракеталарга чектөө киргизүү жана аймактык күчтөрдү колдоодон баш тартуу талаптары камтылышы керектигин билдирген. Тегеран бул шарттардын баарын четке какты.
