Украинанын президенти Владимир Зеленский Украина, Россия жана АКШ катышкан кийинки үч тараптуу сүйлөшүүлөр 4–5-февралда Абу-Дабиде өтөрүн билдирди. Бул тууралуу ал 1-февралда социалдык тармактардагы баракчасына жазды.
«Украина мазмундуу сүйлөшүүгө даяр жана анын жыйынтыгы согушту чыныгы жана ар-намыстуу жол менен аяктоого жакындатышын каалайбыз», — деп белгиледи Зеленский.
Россия менен АКШнын расмий өкүлдөрү бул маалыматка азырынча комментарий бере элек. Ошол эле учурда ТАСС агенттиги таркаткан маалыматта сүйлөшүүлөр тараптардын макулдашуусу менен жуманын ортосуна белгиленгенин билдирди.
Буга чейин үч тараптуу сүйлөшүүлөр 1-февралда өтөт деп күтүлгөн. Айрыкча 28-январда Россия президентинин басма сөз катчысы Дмитрий Песков «1-февралга сүйлөшүүлөр пландалууда» деп билдирген.
Бирок 30-январда Владимир Зеленский АКШ менен Ирандын ортосундагы мамилелердин курчушуна байланыштуу жолугушуу башка күнгө же башка жерге жылдырылышы мүмкүн экенин айткан.
Белгилей кетсек, Украина, Россия жана АКШнын катышуусундагы биринчи айлампа сүйлөшүүлөр 23–24-январда Абу-Дабиде жабык форматта өткөн. Бириккен Араб Эмираттарынын Тышкы иштер министрлиги сүйлөшүүлөрдүн жүрүшүндө Украина менен Россиянын делегациялары түз байланышта болгонун маалымдаган.
Украин тарап жолугушууну «позитивдүү» жана «конструктивдүү» деп бааласа, Россия өкүлдөрү алгачкы байланыштардан жогорку натыйжа күтүүгө болбой турганын билдиришкен.